2021-03-11 18:37:13
ApendiTalk: Намазды қазақша оқыса бола ма?Бүгін Әпенді шылдырлаған оятқыштан оянып кетті. Түнімен көрші райондағы мешіттің шалдарымен пабджи ойнап, таң намазын қаза қыла жаздады. Содан апыл-ғұпыл намазын оқи сала ала шапанын желбегей жабылып қызыл мақпал жайнамазында терең ұйқыға кеткен-ді...
Сағатына қараса, бесін намазына бір сағаттай уақыт қалған екен. Содан дәретін жаңартып, қуат индикаторы қызарып тұрса да Клабхаусқа кірді. Мүридтері жиі өтініп «Клабхаусқа келсеңізші, ұстаз» дей бергесін кеше бұл жақтан аккаунт ашқан еді. Дереу бөлме ашып, «Не сұрақ, не әңгіме?» деп жазып қойды. Әдеттегіше, Сұрапқал шәкірті елден бұрын кіріп, қолын көтерді.
- «Уа, түрі төрткүл Тиктокқа танымал, исі инстаграмға мәлім Әпендім! Сізді мазалағаныма кешірім сұраймын. Бірақ мына сұрақ толғағы ұстаған әйелше түн ұйқымды төрт бөліп тұрғаны. Айып етпесеңіз сұрасам деймін...
Кеше желіде бір бейнамаз атқамінер «біздікілер намазды неге қазақша оқымайды, әйтпесе, бұл арапшылдық» деді. Шынымен ойлап қарасам, неге намазды қазақша оқымасқа, тілге жеңіл, әрі не оқығаныңды сезініп, ұғынып тұрасың. Бұған не дейсіз, Әпендім???»
«- Ее, шәкіртім... Бұл сұрақтың алғаш көтерілуі емес. Бұған дейін мұны сан мәрте сұрағандар болды. Бұдан кейін сұрала береріне (тілі келмей, тұтықты) шүбә жоқ. Қызығы, мұндай сұрақты намаз оқып жүргендер немесе намаз оқуға шамасы жетпей жүргендер емес, әліпті таяқ деп білмейтін, діннен дымы жоқ,тырнақ астынан кір іздеп молдалардың басқан ізін аңдып жүретіндер қояды. Бұл жолы да солай болған секілді ғой..
Жә, сұраққа өтейін... Сұрапқалжан қарашы, мысалы сен «Reebok» деген-ді қалай оқисың?
- Ребук, Ребок әлде Рибук? Нақты білмедім...
- Егер сен базардан «Ребук» деген қазақша жазуы бар кроссовка көрсең алар ма едің?
- Жоға, оригинал емес қой.
- Ал, егер Reebok-тің эмблемасын қойып, астында «африкалық үшкір мүйізді желаяқ бөкен» деп жазып қойса ше?
- Бұл не тағы?
- Қазақша аудармасы ғой.
- Біртүрлі екен...
- Көрдің бе, мүриджан. Оригиналдың өзіндік құндылығы бар. Дін де құдды бренд уә классика секілді (тура түсінбе ). Қаншалықты түпнұсқаға жақын - соншалықты құнды. Не үшін туристер Мона Лизаны көру үшін Луврға, Тәж-Махал үшін Үндістанға ағылады. Себебі, ғаламтордағы кескініне қарағаннан гөрі живой көрудің кәйпі басқа.
Егер намазды қазақша оқысақ, Қағбаға барып тәу етудің мәні, қажылықтың құны да қалмас еді. Әрі әркім Құранды өз бетінше аударып, шаласауаттылар ұмытқан жерін ойша түзеп быт-шытын шығарар едіңдер. Қырғызша оқып тұрғанға шешен ұйымай, түрікше азанды сендер жақтырмай (так и так ұнатпайсыңдар) фитнаның көкесі болар еді. Намаздың рухы жоғалып, ихсанның күлі көкке ұшар еді. Тәжуид үйрену, Құран жаттау сынды құлшылықтар адырам қалып, қари, хафиз деген қадірлі тұлғаларды Қызыл кітаптан майшаммен іздер едіңдер. Сондықтан намазды араб тілінде оқу үмметтің бірлігі мен діннің тұтастығы үшін ауадай қажет, мүриджан...
- Мащалла, Әпендім. Сақалыңыз қандай ұзын, біліміңіз де сондай терең екен. Сіздің даналыққа тағы бір мәрте тәнті болдым – деді Сұрапқал шәкірті көзінің оты жана.
- Ұстаз, мен де сұрақ бар еді – деді тағы бірі қолын көтеріп - Дүниені жүректе емес, қолда ұста дегенді қалай түсінсе болады - деп жатыр еді телефонның қуаты бітіп өшті де қалды. Әпенді көтеріңкі дауыспен:
- Әй, тоқалжан, телефонның зарядкасын әкелші - деді де бір апта бұрын шәкірттері сыйға тартқан су жаңа Iphone 12 Pro Max-ын үнсіз сипай берді...
Ас бөлме жақтан кербездене келе жатқан жас келіншектің жүрісі естілді.
11.3K views15:37