2022-06-15 17:25:07
C (372): Бадр шайқасына қанша мұсылмандар қатысты?
Ж (372): 313 пен 319 арасы.
Д (372): Әл-Бара ибн Азиб былай баяндаған: «Біз, Мухаммадтыңﷺ сахабалары, арамызда Бадр шайқасына қатысқан адамдардың саны Талутқа еріп, өзеннен өткен адамдардың санындай болған деп айтатынбыз. Ал Талутпен бірге өзенді мүминдерден басқа ешкім өтпеді және олардың саны 313 пен 319-дың аралығында болған еді»*.
*Әл-Бухари, 3958. Талуттың оқиғасы деп Құранда айтылған оқиға меңзеліп тұр. Тәпсірлерде Ғамалқа деген елдің Исраил ұрпақтарына басқаншылық жасап, жерлерінен айдап шығарып, ата мұралары, діни кітаптары қойылған сандықтарын тартып алып кеткені туралы айтылған. Ал сол Ғамалқаның ұрпақтарынан Жалут деген патшаның заманында Исраил ұрпақтары өз пайғамбарларына: «Бізге бір патша сайлап бер, оның қол астында соғысамыз» дейді. Аллаһ Тағала былай деген: «Мусадан кейін (өмір сүрген) Исраил ұрпақтарының басшыларын көрмейсің бе? Сол уақытта олар өз пайғамбарларына: «Бізге патша сайлап бер, Аллаһ жолында соғысамыз», - десті. Пайғамбар: «Ал сендерге соғыс парыз қылынғанда сендер соғыспай қоюларың мүмкін бе?» - деді. Олар: «Бізге Аллаһ жолында соғыспайтын не болды? Расында, жұрттарымыздан, бала-шағаларымыздан қуып шығарылдық», - десті. Бірақ оларға соғыс парыз болған сәтте, олардың өте аз бөлігінен басқалары бас тартты. Аллаһ залымдарды біледі. (246) Оларға пайғамбарлары: «Расында, Аллаһ сендерге Талутты патша етіп сайлады», - деді. Олар: «Одан көрі патшалыққа біздер лайықтырақ бола тұра, ол қалайша бізге патша болмақ? Сондай-ақ оған мал-мүліктен де кеңшілік берілмеген ғой», - десті. Пайғамбар: «Негізінен, Аллаһ оны сендерден абзал көрді, әрі білімі мен дене (күшінде) сендерден артық қылды. Аллаһ билікті қалағанына береді. Аллаһ әр нәрсені кеңінен білуші», - деді. (247) Олардың пайғамбарлары: «Оның патшалығының белгісі - сендеге Раббыларың тарапынан ішінде тыныштық (сакина) болатын сандықтың келуі болады. Онда Мусаның отбасынан әрі Харунның отбасынан қалған заттар болады әрі оны періштелер көтеріп алып келеді. Расында, осыда сендер үшін анық аят-белгі бар. Егер мүмин болсаңдар. (248)». Сонда Талут әскерлерімен шыққан сәтте: «Расында, Аллаһ сендерді бір өзенмен сынайды. Кім одан ішсе, менен емес. Және кім одан татпаса, әрине, сол менен. Бірақ кім қолымен бір көсіп алып қана ішсе - басқа», - деді. Сонда олардың өте азынан басқасы одан ішті. Сонымен Талут және онымен бірге иман келтіргендер, өзеннен өткен шақта: «Бізде Жалут және оның әскерлеріне төтеп берер күш жоқ», - деді. Бірақ олардың арасындағы Аллаһпен жолығатындарын анық білгендері: «Аллаһтың қолдауымен қаншама саны аз топ саны көп топты жеңген. Аллаһ сабырлармен бірге», - деді. (249) Олар Жалутпен және оның жауынгерлерімен бетпе-бет болған сәтте: «Раббымыз! Бізге сабырлық беріп, табандарымызды мығым ет, әрі бізге кәпір қауымға қарсы жәрдем бере көр!», - деді. (250) Сонда олар Аллаһтың бұйрығымен оларды жеңіліске ұшыратты, әрі Дауд Жалутты өлтірді Және Аллаһ оған патшалық пен даналық сыйлап, оған қалағанынан үйретті. (Темірден сауыт жасау, құстардың тілін білу) Аллаһ бір адамдарды басқалары арқылы ұстамаса, жер жүзі бұзылар еді. Аллаһ бүкіл әлемге кеңшілік иесі»
(«әл-Бақара» сүресі, 246-251-аяттар).
140 viewsedited 14:25