men❤️‍🩹

2022-08-29 19:21:38 “таланттар” мекені…

филфакта жеті жыл жүріп талай талантты көрдік.
сонда бірдеңені байқадым.
филфакқа түсетіндер мен түлектерінің ішінде бір “ерекше” топ бар.
олар “ерекше елден ерек”.
шын ерекше емес.
“тырнақшаның ішіндегілер”.

олар – жасандылыққа жақын, табиғилықтан гөрі балалық қиялдың жетегінде жүрген жас өркен.
арман қуып келген қыз-жігіт бойындағы жалынын, ынта-ықылас, шабытын оқу-тоқуға, өзіндік дамуға бағыттаудың орнына сауық-сайран, жеңіл-желпі жүріске бөледі, аттың жалы, түйенің қомында жүріп сабақ оқыған болады…
сөйтіп жүріп талантына сенген талапкердің жүріс-тұрысы сұйыла бастайды, сүйкімі кетеді.
күн мен түні ауысады, қазақшалап айтқанда беліне көтере алмайтын шоқпар байлап алады.

жасампаздықты жасандылықтан айыра алмай жүрген жеткіншектердің көбі ақын, өлең оқығыш, рөлге кіргіш, пафосқа тойып алған, кеуде кергіш, әртіс болады…Алла берген талантты тізгіндей алмай басын тауға да, тасқа да ұрады.
ең жаманы тіл алмайды ондай кісілер.
еліктеймін деп еліріп, өзін қоғамнан өзі бөліп-жарып, қиялдана бастайды.
түбі тәкаппарлыққа, менмендікке апарады.
құр қиял адамды адастырады я алжастырады емес пе?!

кейінірек ішеді, өлеңін жаза жүріп шегеді, түбі оқудан шығып, сан соғады.
ондай әуре-сарсаң кімге керек, қарағым?)
филфакқа түсем деген тіл-әдебиеттің төңірегіне топтасқан , тағдыр қосқан жас өркенге айтарым сол – образға кірмеңдер, сабақ оқыңдар.

тіл-әдебиетті бітірген адамдардың саны бар да, сапасы жоқ… оны түзеу бойды да, ойды да тәрбиелеуден басталса керек.
кердең-кердең еткен, руханияттан жұрдай талант кімге керек?!
кім тіл-әдебиетті оқымай жатыр?!
сенің ақын-жазушылығың, әртістігің, шеберлігің сенің мойныңдағы адамгершіліктің көрсеткіші емес, сені зиялы қылатын дүние талант қана емес.

филфакқа түскен әр студентімді жақсы көрем негізі.
бірақ ішінде он екіде бір нұсқа жоқ, дыңғыр-дыңғыр еткендері тағы бар…
“дүние де өзі, мал да өзі ғылымға көңіл бөліңіз”. Ашу / Түсініктеме

2022-08-28 13:23:10 сын шын болсын, шын сын болсын Ашу / Түсініктеме

2022-08-28 13:21:58 биылғы жеңісім – адамның разылығы үшін, көңілі үшін, бәз біреулердің сөзі я өзі үшін тырмысып, терлеп-тепшімейтін болыппын.
не істесем де, адамға байланып, тәуелді болмай жүректі өз Иесі Аллаға байлау керек екенін түсіндім.

Алла разы болса болды.
жеееп-жеңіл боп қалдым.
қызық айтайын – ол кезде адам да разы, жүрек те тыныш, және (!) шаршамайсың. Ашу / Түсініктеме

2022-08-28 13:16:56 арық сөйлеп, семіз шық.

қазағымның пәлсапасынан айналасың ғой. Ашу / Түсініктеме

2022-08-25 19:38:50 жалғасы…

нәтиже үшін жұмыс істемеу керек.
Нәтижені сен үшін ыңғайлайтын Алла разылығы үшін жасау керек. “Оқы!” ,– деді ме? Болды, оқы!
Міне, осы жерде шайтан оң жақтан жақындайды пендеге. Неше түрлі аят, хадисті есіңе салып, есеңгіретеді – өзің үшін, нәпсіңе жаққандығы үшін ғана ғибадат-құлышлық жасатқызады.
ал пенде ондай құлышлықтан бірде болмаса бірде жалығады… тастайды.
Алла үшін жасалатын амалдан адам шаршамайды.

нәпсімен күрес – ееең үлкен күрес.

бір адамды өзіңнен төмен санау саған күнә үшін жеткілікті. Ал күнә күпірлікке апарады. Осыны есте ұстау қажет.
Жәндіктердің өзі жасамайтын нәрсе – олар бір-бірінің сыртынан күлмейді, төмендетпейді, келемеждемейді.
Ешкімді төмендетпе! Өзіңнен төмен санама! Пайғамбарымыз өлікке де орнынан тұрып құрмет көрсеткен. Тіпті яһудидің. Мұмылманның емес. Неге?
Себебі оның заты – Алланікі еді.
Ал Алланың жаратқаны – ұлы Шебердің туындысы. Оны біздің төмендетуге қандай хақымыз бар?)
Адамның өзін емес, оның іс-әрекетін ұнатпауға болады.
Себебі ол іс-әрекетті Алла ұнатпады. Мен де ұнатпаймын. Бірақ адамды жек көруге болмайды.

адам өзгелерді кінәлауды, жазғыруды, төмендетуді, жек көруді, кектенгенді тоқтатқанда ғана нәпсінің екінші деңгейіне шығады.
ол адамның бәрін асыл, жан біткеннің бәрін жақсы көреді.
“Бәрі жақсы, мен жаман.
Бәрі бидай, мен сабан” ,– дегендей.

ешқашан сұрақ қоюды тоқтатпа. сұрақ қоюды тоқтатқаның – ойланудан қалғаның.
قلب
(жүрек) сөзінің түп мағынасы
“құбылмалы, ауыспалы, өзгермелі” дегенге саяды… иман жоққа ұқсайды, бірде бар, бірде жоқ.
жүректегі иманды сәт сайын тексер, жаңарт. Алла 1 секундта жетпіс рет қарайды жүрекке. Пайғамбарымыз күнәсіз, пәк бола тұра күніне жетпіс мәрте кешірім сұраған Алладан, пана тілеген.

”мұсылман” сөзінің төркіні “тәслим” сөзінен тараса керек. Ал “тәслим” дегеніңіз “өзін толық Аллаға тапсырған” дегенге келеді. Мұсылманның әр әрекеті тек Алла разы болатын істер.

әрекетсіз иман күшеймейді.
пайдасыз әдет, қауіпті қылықтан құтылу үшін жақсы амалдар санын арттыру маңызды.
бір жақсы амалдан соң кідірмей екіншісіне көшкен жөн.
Шынайы, кәміл иман әрекет, амал арқылы ғана келеді.

әулие адам – Алла оның нәпсісіне разы, оның нәпсісі Аллаға разы адам. Өмірге де, өлімге де разы. Өлімнен де, өмірден де ләззат алатын адам. Ашу / Түсініктеме

2022-08-19 17:43:07 Төребек ағайдың семинарынан түйген оймақтай ойлар:
(өздеріңіз барып көріңіздер.
кеңес берем)

Алла адамды жаратты да, бірден сұрақ қойды, демала тұр демеді. Ойлануға итермеледі.
Жан-жануарға берілмеген нығмет – ойлану, ой жүгірту, терең ой.
“Ақыл иелері, … ойланбайсыңдар ма?”– деді.
әрекет – берекет.
үнемі сұрақ қой – ойлану үшін.
“Кім үшін?” деген.

өзің сасық батпаққа белшеңнен батқансың – бәрін сасық деп ойлайсың, бәрін батпаққа тартасың.
Абайша айтсақ, “өзі шошқа өзгені ит деп ойлар”.
өзі Патша, өзгені құл көреді.
бұл батпаққа батқан жәндіктің ойы. 1-нәпсінің халі.
2-нәпсіге шыққан адам “өзі туралы жақсы ойлайды, өзгені өзінен де жақсы екен деп түсінеді”.

адамда өзін жазғыруға хақы жоқ. Адам өзін де, өзгені бағалай алмайды, жазғыра да.
“Мен қателікті қабыл етем, мойындаймын. (Тіпті) Өзімді кінәлай алмаймын”
Ондайға рұқсат жоқ менде.
кімнің кінәлі екендігі Сот күні анықталады және оны Ол шешеді. Ашу / Түсініктеме

2022-08-18 10:31:42 ер адам босаңсыса – аза бастайды.
жігіт адам жауапкершілік арқылы жетіледі, жүк арқалаған азамат азбайды.

Алла бізге отбасы түгіл, ел-жерді, қоғамды, көпшілікті асырайтын, қамын жейтін күш те, мүмкіншілік те, қуат та дарытқан… Ашу / Түсініктеме

2022-08-18 10:11:36 “қыз-келіншек, әйелдер қауымы, аналар, апалар жұмыс істеуге міндетті емес, оны асырайтын еркегі, арқасүйер азаматы, отағасы ғой негізі” ,– деген ойды қазір біздің қоғам қабылдамайды…
қабылдай алмайды.
“жұмыс істеме” деген бір басқа әңгіме, “жұмыс істеп, ақша тауып, тозу, нан табу – қамқоршысы бар әйелдің міндетіне кірмейді!”,– деген мүлде басқа әңгіме.
біріншісі – төмендету боп көрінуі мүмкін, екіншісі – қамқорлық.

қоғамның қабылдамау себебі – өздері шешелерінің иттей боп жұмысқа жегіліп, тікесінен тік тұрып, мұрнынан шаншылып 30-40 жыл табан аудармай бір жерде, мардымсыз жалақыға жұмыс істегенін көріп өскен ұрпақ, кеңестік кезеңнің пәрмен, бұйрығына еріп комбайнға отырған, соғыс жылдары ер-азамат қалмағанда “тең құқылысың, кімнен кемсің, ерле” деген айтаққа еріп атқа мінген, суды да тасыған, отынды да жаққан, бала да оқытқан, егін де еккен, шошқа да баққан қазақ әйелі… жұмысқа жеккен.
жұмыс күшін толтырған әйелдермен.
соны көрген ұрпақ “маматай, жұмыс істемей-ақ қой”, асыраушың бар, “апа, демалсаңызшы”,– дегенді қабылдай алмайды, “әйел құлша қызмет етіп, жарғақ құлағы жастыққа тимей жүгіруге міндетті емес, уайымдама, демал, өзіңе қара, құлшылығыңды түзе”,– дей алмайды… сана басқа себебі.

Жұмысты жанбағыс үшін, күйбең тіршілік үшін емес, жан рахаты үшін, даму үшін, тәрбие үшін істегені абзал әйел адамның…өзі үшін.
Тапқан табысын еріне, енесіне тағы басқаларға беруі тіпті шарт емес…

ер-азаматтар әйелін, анасын, қарындасын алақанына салып, аялап, қажеттілігін өтеуі керек.
әйел адам бала тәрбиелегені, жанынан табылғаны жөн.

Асыраушы рөлінде жүрген өкшесі тесіліп, табаны тозып, күн астында күйіп, жүк көтеріп, белі қайысқан апаларды, аналарды көргенде соны ойлайсың.
Бұл теңдік емес, жауапсыздық қой.
Жұмыс істемесін демеймін, істесін.
Бірақ ана ретінде жұмыстан да маңызды қызметі бар әйел адамның.
Әйел адам ақша табуға міндетті емес. “Еркек” болуы керек емес!
Жұмыс істеп, тозуға міндетті емес.
Аналарымыз күйіп-пісіп, терлеп тепшіп, денсаулығын құртпауы керек. Рөлін ауыстырмағаны жөн. Күтім керек…

Қарапайым табиғи жаратылыс заңы бойынша да, психологиялық аспектіде қарасаң да, шариғи үкімге салсаң да, дәстүріміздің, діліміздің төңірегінен іздесек те бір қорытынды – әйел затына әкесі, күйеуі, ағасы, қамқоршылары жауапты, олар тірі кезде ешкім жұмысқа жеге алмайды, “ақша тап” деп міндетсіне алмайды, таппадың деп ренжи алмайды!

Ер-азамат жауапсыз болса, әйел тозып шыға келеді… Ашу / Түсініктеме

2022-08-18 09:48:59 Төребек ағай Бекбаевтың “Нәпсі” семинарына қатыстым...

күйбең тіршілік пен қу дүниенің, нас нәпсінің жүрекке түсірген көлеңкесін сәулелі оймен нұрландырған, пендеуи пайыммен кірлеткен кеудені тазартқан кеш болды.
Абайдың атамның
“Әділет пен арлылық, махаббатпен –
Үш жолдасың қабірден әрі өткенде”,– деген өсиетінде жатқан нәпсіге ерген адамның ой-өрісі қабірге дейінгі деңгейде ғана болатынын, тән құмарына берілген кісінің Құдайға емес, қу дүниеге құл болатынын аңғардық.

кешегі кеште айтылған орамды ойдың оймақтайын жаза кетейін:

нәпсі – тәрбиеленбеген рух.
рух – тәрбиеленген нәпсі.
нәпсінің жеті түрі болады.
күнде таңертең тұрғанда нәпсің хайуани халде оянады, бұл дегенің күн сайын адам болуың қажет.

шайтанның функциясы – ниетті ауыстырып жіберу, сыбырлап сұрқия ой салу.
“Садақа беріп қой. Өзің үшін. Жамандықтан жырақ жүресің, бәледен алыстайсың”,– деп уәсуәса салады. Ал шынында құлшылық, садақа, намаз барлығы Құдай үшін. Ол үшін.
Аты жаман шайтанға ерсең, садақаны өзің үшін бергізіп, намазды өзің үшін оқытқызады.

мұсылмандық – процесс.
үнемі амал ету, әрекет, харекет.
дұға, дұға, дұға.
яғни жүріс-тұрыс, тыныс, ішіп-жеу, ұйқы, күлкіні Алламен байланыстыру, рұқсатымен жасау және тек рұқсат еткенін істеу.

нәпсі – тажал емес. жеті түрлі деңгейдегі нәпсінің тек біреуі ғана үнемі жамандыққа үндейді.
Қалғаны қаласаң, әулиелікке бастайды.

нәпсі – Аллаға жетелеу үшін берілген.
нәпсі – сен, сенің рухани халің, саған қатыстының бәрі нәпсі.
нәпсі – асау ат.
Басқармасаң басыңды тауға да, тасқа ұрады, тізгіндесең қанатты пырақ боп ұшады.
Пайғамбарымызды миғаржға көтерген пырақ секілді…

нәпсінің функциясы – тоймау.
талап ету, қалау, жалақтап жалмай беру.
ендігі мәселе – нәпсіңді не беріп семірткенің.
дүние берсең, жұта береді, ит қылады өзіңді.
себебі “дүние” сөзінің семантикасы – “дно, ең төменгі, жұтатын” дегенге келеді.

нәпсі не берсең де соны арттыруды қалайды.
нәпсіге тамақты азайтсаң, білім сұрай бастайды.
рухани азық берсең, көбейткеніңді қалайды, содан ләззат алады…
Жалғасы бар… Ашу / Түсініктеме

2022-08-14 09:09:41 мынандай бір қағида бар:
сенім (иман) оқу-тоқумен тікелей байланысты.
иман=білім.
білім – ақыреттік білім.

неге дейсіз ғой?
1. адам бірнәрсеге білгенінің деңгейінде ғана сенеді
2. адам білетініне сенеді
3. біліміне қарай амал етеді
4. білім деңгейіне орай сұрақ қояды

мысалы, (1) ақыреттік амал деген түсінік Алланың алдына барғанда барлығы үшін жауап беретінін білмейтін кісіде жоқ.
ол кісінің барлық амалы адамдар үшін, не өзінің қарақан басы үшін жасалған хайуани тіршілік күйінде қалып қояды.
өйткені ол білмейді.
білім жоқ.
(2) осы өмір мәңгілік өмірдің егістігі, өлшем бірлігі, біз болсақ қонаққа келген жолаушы ғанамыз дегенді ақырет өткелдері туралы оқымаған адам білмейді. соған сәйкес – сенбейді.
кей кісілер “Құдайдың алдына барғанда қиналып қалмайық”,– дегенге қатты мән бермейді.
мән бермегені – сеніңкіремегені.
сеніңкіремегені – білімі аздығы.
оқымағаны, айналып келгенде.

неғұрлым көп оқисың, білім іздеп, түйсікке түйіп, көкейге қондырасың, соғұрлым сене түсесің.

түйін: адам өз білгенінің дәрежесінде әлеммен байланыс орнатады, Алланың сипаттары жайлы ізденгеніне қарай, тани бастайды, ғұмырлық өлшемдердің заңдылықтарын меңгермейінше әбігер болады.

дінді дұрыс ұстанбауыңның себебі – ілім-білім ізденбегенің.
Құдайды танымауыңның себебі – Жаратушыңның есім-сипаты жайлы оқымағаның, терең бойлап, жаратылыс сырына үңілмегенің. Ашу / Түсініктеме