2022-09-01 17:37:59
ЖӘННЕТКЕ ЖЕТЕКЛЕЎШИ ӘМЕЛ
Исламдағы ең гөззал буйрықлардан бири силаи раҳм, яғный, жақынлар менен туўысқанлық байланысларын байлаў, досларға меҳир-ақыбетли болыў. Силаи раҳм дәслеп Аллаҳ тааланы бенделерине буйырған әмеллеринен бири. Аллаҳ таала айтады: “Ҳәм араларыңыздағы сораў-жуўапларда ортаға аты қойылатуғын Аллаҳтан қорқың ҳәм әғайин-туўысқанларыңыз бенен ажыралып кетиўден сақланың”. (Ниса сүреси, 1-аят)
Силаи раҳмда Аллаҳтың разылығы, мөминлер ҳәм периштелердиң қуўанышы, шайтанға ғам жеткизиў, өмирдиң зыядалығы ҳәм ырысқының берекети киби гөззал қәсийетлер жәмленген.
Әбиў Ҳурайра разыяллаҳу анҳудан рәўият қылынады. Расулуллаҳ саллаллаҳу алайҳи ўа саллам: “Кимди ырысқысы кең ҳәм өмири берекетли болыўы бахтияр қылса, силаи раҳмды байласын”, деди. (Имам Бухарий рәўияты)
Ал, басқа бир ҳәдисте Расулуллаҳ саллаллаҳу алайҳи ўа саллам: “Ким өмирин узын, ырысқысының кең болыўын ҳәм жаман өлимнен қутылыўды қәлесе, туўысқанлары менен байланысын тиклесин”, деген. (Имам Аҳмад рәўияты)
Бул соншелли уллы ибадат, оны қылған адам қаншелли көп саўап ҳәм пайдалар таўса, оны тәрк қылған, оған бийпарық болған адам соншелли қатты гүнакар ҳәм зыянкер болады. Расулуллаҳ саллаллаҳу алайҳи ўа саллам айтады: “Силаи раҳм саўабындай тез келетуғын жақсылық жоқ. Дүньяда тезде азап берип, ақыретте де азап келтиретуғын гүна силаи раҳмды үзиў”. (Имам Термизий, имам Аҳмад, имам Ибн Мажа рәўияты)
Қалаберсе, силаи раҳмның дозақтан узақласыўына ҳәм жәннетке жақынласыўына себеп болатуғын әмеллер менен бир қатарда зикир қылыныўы уллы ибадат екенине дәлалат қылады.
Әбиў Айюб Ансарый разыяллаҳу анҳу айтады: “Бир аъробий Пайғамбар саллаллаҳу алайҳи ўа салламның алдына келип: “Ҳәй Расулуллаҳ алайҳиссалам жәннетке жақынластыратуғын ҳәм дозақтан узақластыратуғын әмелден хабар бериң!”, - деди. Пайғамбарымыз саллаллаҳу алайҳи ўа саллам Аллаҳға ибадат қылыўға, Оған ширк келтирмеўге ҳәм намаз оқыўға, зәкат бериўге ҳәм силаи раҳм қылыўға буйырды. (Имам Бухарий, имам Муслим рәўияты)
Демек, силаи раҳм қылыў динимиздиң биз мөминлерден талап етилген қатаң талабы. Солай екен, бул гөззал әмелге бийпарық болмайық.
Тарқатың: http://t.me/nasiyatuz
766 views14:37