2022-03-14 10:10:10
Мотиватор!
Талғат Маруаұлы Байсуфинов Қазақстан ұлттық құрамасы бас бапкері қызметінен кетті. Оның орнына Андрей Карпович келді. Талғат ағамызға алғыс айтып шығарып салғанымызбен, бұл кісінің бір жылда істеген шаруасына ешкім әлі баға бермеді. Ендеше бұл кісінің қасында жүрген баспасөз хатшы неге бір ауыз сөз айтпайды?
Ең алдымен біз Қазақстан - Франция ойынының алдында баспасөз мәслихатын түгел қазақ тілінде өткіздік. Талғат Маруаұлы қазақша сөйлеген соң тілшілердің де сұрақ қойып белсенді болғаны анық. Қазақ тілінде сөйлеген адам қазаққа жаны ашиды, ұлттық құраманың намыссыз жеңілгенін қаламайды. Сосын бұл кісінің ерекше ұстанымдары болды. Ойынға дейін киім шешетін бөлмеге сырттан ешкімді кіргізбейтін. Ойынға дейін дәріс оқып, футболшыларға бәрін түсіндіреді. Бірақ, футболшылар 15 минут ойыннан кейін бәрін ұмытып қалып жатады. Футболда өзі солай. Бірінші таймды нашар ойнап, өз-өзімізге келе алмай жатқан соң, үзілісте бас бапкер шәкірттерін сабырға шақырады. Әркімнің қаталігін көрсетіп, жүрегіне жететін сөздер айтатын. Соның арқасы шығар, соңғы іріктеу ойындарының барлығында 2-таймда гол салып шықтық. Украинаға Киевте, "Астана Аренада", сосын Босниямен 2:2 ойнағанда да 2 голды екінші таймда салдық. Бұл бапкердің мотиватор екендігінің дәлелі. Бұрын естеріңізде ме, Қазақстан құрамасы бірінші таймды тамаша ойнап, екінші таймда шаршап қалып, соңғы минуттарда гол жібере беретін еді. Талғат Маруаұлының кезінде барлығы басқаша болды. Футболшылар шаршап қалса қолды бір сілтеп жандарын қинағысы келмей жүру деген жоқ еді. Барлығы да жанын салып ойнады. 90 минуттарда біз гол салудың көкесін көрсеттік. Украинаға да, Боснияға да.
Босния демекші, соларға қарсы ойынның алдында бір күн бұрын қонақүйде түнімен видео монтаждап, ҚФФ сайтына мақалалар салып отырдым. Талғат ағамыз қайта-қайта далаға шығып, темекі тартып, ұйықтай алмады. Үшінші мәрте сыртқа шыққанында:
- Ей анау футболисттер бәрі ұйықтап жатыр ма? - деп менен сұрады.
- Иә, тым-тырыс бәрі ұйқыда, - дедім.
- Оларға рахат қаперсіз жата береді ұйықтап, мен болсам ертеңгі матчты ойлап мазам болмай тұр", деп екінші темекісін қатарынан шекті. Баспасөз мәслихатында Босния тілшілері "аутсайдер командасыздар ғой" дегені намысына тигені анық. Сол жиыннан шығып футболшыларға қатты-қатты батырып айтыпты. Ертесіне сол намыспен менсінбеген Босния құрамасына 2 гол салдық.
Теориялық жиында футболшыларға Әлихан Бөкейхановтың қанатты сөздерін келтіріп, өз күшіне сенбеген ұлт ешқандай жетістікке жетпейтінін айтқаныңыз да масқара мотивация болды! Ат айналып қазығын табады. Ұлттық құрамаға бапкер болып түбі қайта айналып келесіз деген сенімдемін, Мотиватор!
4.8K views07:10
K
