2022-04-22 07:48:52
Екінші сыныпқа дейін атам мен апамның (әжемнің) қолында өстім. Мектепке барып, әріп танып, ертегілерді кітаптан оқи алатын дәрежеге жеткенімізше атамның ертегілерін тыңдап өстік.
Сосын тындамайтын болдық, себебі атамыз бізге қызық болсын деп ертегінің түпнұсқасына, негізгі мағынасынан ауытқымай, қосымша оқиғалар мен әртүрлі эффектілерді қосқан екен . 5-6 беттік ертегіні бір сағатқа созып айту үшін де сондай тапқырлыққа баруға мәжбүр болғанын кейін түсіндім. Атам орысша айтқанда "человек энциклопедия" еді. Кез-келген сұрағымызға жауап беретін. Мен сияқты сұрағы таусылмайтын балаға сондай кісінің болғаны үлкен нығмет еді.
Сол атамыздың өмірден өткеніне он үш жылдан асыпты. Ол кісіге үнемі, үздіксіз құранның сауабын бағыштауға тырысамын. Кейде күйбең тіршілік, емтихан деп жүріп, біраз уақытқа құран бағыштауды ұмытып кетсем, көп ұзамай түсіме кіреді.
Көзі тірісінде жаныңа жақын болған, әбден қамқорлығы мен мейіріміне бөлеген, қанша сұрақ қойсаң да ашуланбай, жалықпай жауап берген, барлық ақылы мен даналығын санаңа құюға тырысқан, өмірден өтіп, сағынышыңа айналған адамды түсіңде көрудің, онымен сөйлесудің өзі бір бақыт, сөзбен жеткізе алмайтын керемет сезім екен. Оянып кеткен соң қимастықтан туындаған ішіңдегі бостықты, сезімді айтып жеткізу мүмкін емес...
P. S. Өмірден өткен жақындарыңызды ұмытып кетпеңіздер. Әрдайым еске алып, дұға етіп, құран бағыштап, аттарынан садақа беріп тұрыңыздар. Бәлкім сіз себепті Алла Тағала ол кісілердің күнәларын кешіріп, қабір мен тозақ азабынан сақтап қалар...
رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلّاً لِّلَّذِينَ آمَنُوا رَبَّنَا إِنَّكَ رَؤُوفٌ رَّحِيمٌ
"Раббымыз! Бізді әрі бізден бұрын иман келтірген туыстарымызды жарылқай көр! Әрі сондай иман келтіргендер үшін жүрегімізде бір кірбеңдік қылма. Раббымыз шүбәсыз Сен тым жұмсақ, ерекше мейірімдісің." (9-С. 100-А.)
#өзойым
@oz_oyim
76 viewsedited 04:48