2021-02-12 18:03:17
НАМАЗ ОКЫМАЙ ЖУРГЕН БIР БАУЫРЫМА ХАТ!!!
Ассалаумағалейкум!
Бауырым, амансың ба? Сен әлі намазға жығыла алмай жүр ғой деп, қолыма қалам алып отырмын. Бір мезгіл өзіңмен сырласқым келді. Өйткені, мен де кезінде намаз оқымаушы едім. Оған әртүрлі себептерім, уәждерім, тіпті сылтауларым да бар тұғын…
Сенің де сондай себептерің бар шығар. Әйтпесе, бір Алланың бар екенін өзің де мойындайтын боларсың. Өзіңді мұсылманмын деп есептейтін де шығарсың. Оның өте дұрыс. Егер сен өзіңді мұсылманмын деп есептесең, саған ешкім мұсылман емессің деп айта алмайды. Тек бір Алла біледі сенің жүрегіңде не жатқанын. Сондықтан да сен намаз оқымай жүрсең де, ораза ұстамаған болсаң да мұсылмансың. Тек кәлиманы айтып жүрсең, болғаны. Кәлиманы білесің ғой? Иә, сол. «Ләә-иләәһа-иллаЛлаһ, Мухаммаду-р-рассулаЛлаһ». «Алладан басқа құлшылық етуге лайық Құдай жоқ, Мұхаммед (Ол кісіге Алланың сәлемі мен игілігі болсын) оның елшісі» деген мағынаны береді. Оны өзің де білесің.
Сонымен, бауырым, сен кәлиманы біледі екенсің. Оны тіліңмен айтып жүр екенсің. Егер айтып жүрмеген болсаң, енді айтып жүр. Жатарда айтып жат. Таңертең тұрғанда бір айтып қой. Бұл зор бақыт. Осы бір ауыз сөзді айтуға тәкаппарлығы жібермей қаншама адам дүниеден өтіп кеткен. Сен өйтпе. Айт. Бұл – сөздердің ішіндегі ең пайдалы сөз. Айта бер…
Сонымен сен кәлиманы айтып жүрсің. Алла разы болсын саған. Бақытыңа жет. Жоғарыда айтқанымыздай, осы кәлиманы айтудың өзі бақыт. Қалған бақыт осы мұсылман болу бақытынан кейін тұрған бақыттар. Ата-ананың ризашылығына бөлену, кiшкентай бауырларымызга қамқор болу, достардың ықыласы, отбасыннын амандыгы, өзің қалаған мамандықты игеру… Бұның бәрі де кәлиманы айтудан кейін тұратын бақыттар. Сен осының бәріне де жет. Тілектеспін.
Мүмкін сенің достарың намаз оқитын шығар. Мүмкін жай ғана таныстарыңның ішінде намаз оқитын қыз-жігіттер бар болар. Мүмкін намаз оқитын адамдардың ешбірін жақын танымайтын да шығарсың. Бірақ өміріңде бір рет болса да қаз-қатар тізіліп, жамағат боп намаз оқып жатқан адамдарды көрдің ғой? Олардың дәрет алып, намазға асыққанын, азан шақырылғанда елең ете қалғандарын, бір-біріне деген ыстық ықыластарын байқадың ғой? Сол сәт «шіркін-ай, мен де намаз оқысам ғой» деген ой келді ме? Егер ондай ой келген болса, төмендегі үшінші бөлімді оқы. Ал егер ондай ой келмеген болса, төртінші бөлімнен бастап оқы. Алла саған жеңілдік берсін.
Егер намаз оқуға қызығып, бірақ қалай бастау керек екенін білмейтін болсаң, адамдардан білмейтіндігің үшін ұялатын болсаң, намазға әке-шешең қарсы болатын болса, жұрттың «сектаға кіріп кетіпті», «араб боп кетіпті» деген сияқты сөздерінен қаймығатын болсаң…уайымдама, бұның бәрі ештеңе емес. Бұндай қиындықтар намазға жығылар алдында кез келген мұсылманның алдынан шығады. Оған бірінші себеп, бүгінгі біздің қоғамда Кеңес үкіметінен қалған коммунист кісілердің көп болуы да, екінші себеп, шайтанның азғыруы деп біл. Бірақ бұның бәрі маңызды емес. Ең бастысы сенің намазға жығылуға деген ниетің бар. Қалғаны түк емес. Алла Тағала қиындықтың артынан жеңілдікті өзі береді. Оған уайымдама. Рас, ата-ананың қарсылығы деген өте ауыр тиеді. Бірақ Алла Тағаланың алдындағы парызыңды қалай болса да орындауың ол кісілердің өздеріне пайдалырақ болмақ. Өйткені сен намазға жығылып, иманыңды арттырып жатсаң, ол кісілер үшін дұға жасайсың. Алладан сұрайсың. Мүмкін, сенің себебіңмен ол кісілер де тура жолға түсіп қалар. Қысқасы, сен ондай нәрселерді көп ойлама. Оның бәрі намазға жығылудан қашыратын нәрселер деп түсін. Өзіңнің ойлап тапқан сылтауың шығар мүмкін, оны да ойлап қой.
Егер намаз үйрететін адам жоқ болса, тұп-тура мешітке тарт. Кез келген намаз оқып, мешіттен шығып келе жатқан адамды ұстап ал да, «Ассалаумалейкум, маған намаз үйретіңіз» де. Болды. Ол, Алла қаласа, үйретеді. Өйткені кез келген мұсылман өзгеге дінді үйретудің сауабы қаншалықты зор екенін жақсы біледі. Сондықтан, үйретеді, Алла қаласа. Бастысы, сен сұрауға ұялма. Егер достарыңның ішінде намазы түгел бір мұсылман болса, содан сұра. Иманы бар мұсылман білмейді екен деп саған ешқашан күлмейді. Қайта қуанады, сүйсінеді. Саған риза болады. Сен үшін дұға жасайды.
1.4K viewsMarat Syzdyqov, 15:03