2021-08-10 18:33:44
ДЕНСАУЛЫҚ САҚТАУ САЛАСЫ – ДЕПУТАТТАР НАЗАРЫНДА
Қазіргі таңда белең алып отырған эпидемиологиялық ахуалға байланысты Түркістан қалалық мәслихатына «Ақ жол» демократиялық партиясы атынан сайланған депутат Ардақ Мансұров шаһардағы ауруханалардың жұмысымен танысуда. Мақсат - халықты сапалы медициналық қызметпен қамтамасыз ету жұмыстарының қалай жүргізіліп жатқанын бағамдап, елдің талап-тілегі мен толғандырған мәселелерін ақ халаттыларға жеткізу.
Ардақ Үсенұлы алдымен Түркістан қалалық емханасы мен Түркістан қалалық балалар ауруханасының жұмыс барысымен танысып шықты. Ең бірінші кезекте Түркістан қалалық емханасы бас дәрігерінің орынбасары Серік Әбдіқұловпен тілдесіп, халық тарапынан келіп түскен бірқатар сұрақтарды қойды. Атап айтқанда, тұрғындардың портал арқылы ауруханаға орналастырылуы және қазіргі пневмония дертіне шалдыққан науқастардың КТ аппараты бойынша өкпесін тексерту жағдайы сынды сауалдар болды. Дәрігер өз сөзінде міндетті әлеуметтік медициналық сақтандыру керектігін, портал аштырудың жолдарын кеңінен түсіндірді. Сонымен қатар, қазіргі пандемиялық ахуалмен күресуге арнайы 18 мобильді топ жұмылдырылып, қарқынды іс атқарып жатқандығын жеткізді.
Екінші кезекте Түркістан қалалық балалар ауруханасының ұжымы және бас дәрігері Егізбаев Әбдішүкір мырзамен кездесіп, ұсыныс-пікірлерін тыңдады. Қазіргі таңда пандемиялық жағдайда ересектермен қоса жаңа туылған шараналардан да пневмония белгілері анықталған бір-екі жағдайлар тіркелгендігін жасырмады. Депутат аруханадағы КТ аппаратының жұмысын бақылап, функцияларымен танысты. Бөлімдердің мамандарымен тілдесіп, дәрігерлердің ұсыныстары мен тілек-өтініштерін тыңдады. Халық стационарлы ем қабылдау үшін әуре-сарсаңға түсіп, қағазбастылыққа кезігіп жататын жағдайлардың көп екендігі айтылды.
Депутат Ардақ Үсенұлы тұрғындарға портал беру жүйесін бірізділікке түсіру қажеттігін жеткізді. Сондай-ақ, халыққа міндетті әлеуметтік сақтандыру аясында КТ аппаратына тегін түсуге болатындығы дұрыс түсіндірілмейді. Осы орайда депутат Ардақ Үсенұлы емхана мен аурухананың басшылық құрамына сын-ескерту жасап, денсаулық сақтау министрлігінің арнайы қаулысына сәйкес жұмыс жүргізу қажеттігі жөнінде өз ұсынысын білдірді. Сөз соңында, «Ақ жол» демократиялық партиясының қалалық мәслихат депутаты Ардақ Мансұров ақ халатты абзал жандардың жұмысына сәттілік тілеп, халық үшін аянбай еңбек етуге шақырды.
119 views15:33