2022-04-22 04:14:51
[
Dis manibusque sacrum]
Әнімнің әуезі баяғы.
Ештеңе өзгерген жоқ екен.
Өзгеріс – ақиқат дұшпаны.
Ойларым себепсіз сөздерден,
Сәл ғана биіктеу ұшпады.
Әйтпесе,
"Әр адам бақытты болуға тиісті!"
– дей алар
ақымақ немесе
Жаратқан.
Әлемде бұл күні
алғашқы сезім жоқ,
Барлығы екінші санаттан.
Өркениет өледі.
Ізі де қалмастан, әттең-ай!
Адамзат тарихы – тоқырау.
Өткенді білмеген жөн шығар,
Жөн шығар тарихты оқымау.
Алайда,
Өзім-ақ айтып ем біреуге:
"Көк аспан – адамзат құрдасы.
Анық қой адамның бұл Жерде
Мәңгілік тұрмасы"
Сонда да біз өткен белестің
Қаншасы қыр болып төселді.
Қанша рет жұмыр жер,
Ғаламат опат боп жөтелді?
Белгісіз...
Осылай білместен,
Жөн шығар өзгермей күн кешкен.
Әнімнің әуезі баяғы.
Өзгеріс – бәрінің бастауы.
Өзгеріс – бәрінің аяғы.
2022
58 viewsedited 01:14