2022-12-26 13:41:36
АРЫСЛАН МЕНЕН ТЫШҚАН
Теректиң түбинде уйқылап жатырған Арыслан қандай да бир сытырлыдан оянып кетипти. Көзин ашып қараса, тумсығының алдында бир тышқан тур екен. Ол тап берип, тышқанның қуйрығынан услап алыпты.
– Реҳим ете гөр, тақсыр, – депти Тышқан даўысы дирилдеп жалынып.
– Уйқымды неге буздың?! – депти ғәзепленген Арыслан даўысы гүркиреп.
– Әпиў ет, тақсыр! Аўқат излеп жүр едим, жибере гөр, мен де бир хызметиңе жарап қаларман.
– Сықылыңа қарап сөйле, ант урған, сениң шамаң неге келетуғын еди!
Арыслан кеңкилдеп бираз күлип турыпты да, реҳими келип, тышқанды жөнине жиберипти.
Күнлерде бир күн тоғайға бир мерген келип, Арысланның ақырған даўысын еситип:
– Билиўимше, бул Арысланның сийрек гезлесетуғын туқымына усайды. Буны услап алып, ҳайўанатлар бағына сатып жиберейин, деп ойлапты аңшы. Көмекке дәрҳал досларын шақырып, Арыслан суў ишетуғын суўатқа дузақ қурып таслапты.
Шөллеген Арыслан дәрьяға киятырып, дузаққа түсип қалыпты.
Ол әри жулқынып, бери жулқынып, торға орала берипти, ақыр соңында пүткиллей қозғала алмай қалыпты. Әптен шаршап, ҳалдан кетипти. Аш болыпты. Сөйтип әбигерленип турғанда, тышқан келип, өткир тислери менен жипти үзе баслапты ҳәм Арысланды босатып алыпты.
–“Мен де бир хызметиңизге жарарман” дегенде, мениң үстимнен күлип едиңиз, тақсыр,– депти сонда Тышқан. – Сизиң ақырған даўысыңызды еситиўден-ақ жәрдемге жетип келдим. Енди мениң ўәдеме опалы екенлигиме көзиңиз жеткен шығар.
Арыслан әўелги айтқан сөзлерине уялып қалыпты.
@QARAQALPAQMILLETARIUSHIN
509 viewsedited 10:41
Т
