«Otandastar Qorı» KeAQ ūyımdastıruımen 12-17 jas aralığındağı | «Otandastar Qory»
«Otandastar Qorı» KeAQ ūyımdastıruımen 12-17 jas aralığındağı şeteldegi qazaq balalarına arnalğan jazğı lagerdiñ aşılu saltanatı ötti.
Lager Aqmola oblısı, Burabay audanı, Şuche köliniñ oñtüstik şığıs jağalauında ornalasqan «IQanat High School of Burabay» mektebiniñ bazasında 2022 jılğı 17-28 şilde aralığında ūyımdastırılğan.
Qazaqtıñ ūlı aqını Abay Qūnanbayūlınıñ tūjırımdamasına say talap, eñbek, tereñ oy, qanağat, raqım qūndılıqtarına negizdelgen būl lagerge Fransya, Türkiya, İran, Qırğızstan, Qıtay, Moñğolya, Özbekstan, Reseyden 84 qazaq balası kelip qatısuda.
Sonımen qatar, qazaqtıñ ūlttıq bolmısı, salt-dästür, öneri men zamanauy bilim, ğılım tendensyaların onıñ işinde STEM, robototehnyka, käsipkerlik, jobalardı basqaru dağdıları ūştastırılğan.
Atalmış lagerdiñ aşıllu saltanatında «Otandastar Qorınıñ» Prezydenti Abzal Saparbekūlı qatısuşılardı Balalar jılımen qūttıqtap, Atajūrtqa kelip alañsız boy sergitip, oy jynaqtap, tamaşa demalıs ötkizuine tilektes ekenin ayttı:
«Sizder, älemniñ qay qyırında jürseñizder de, janıñ da, qanıñ da, qazaq ekenin ūmıtpay, qaysar ūltımızdıñ bir tuar ūlı bolıp, halqımız üşin qaltqısız eñbek etetin eljandy azamat bolularıñ kerek! Al, ozıq oylı azamat, oza şabar qazanat bolu üşin - eñ aldımen sapalı bilim, sanalı tärbye aluğa tyissiñder! Jūmır jer jūmağındai, Tūrannıñ tūmarınday - Atajūrtta alañsız boy jazıp, ädemi äsermen tamaşa demalıp qaytularıñızğa tileulestik bildiremin! Tabyğat kelbetinde, tamaşa jer betinde jaña oy, jarqın ydeyalar tuıp, aldağı ömirleriñe özek bolğay!»
Şeteldegi qazaq balalarına arnalğan jazğı lagerler 2019 jılından bastau alğan edi. Sol jılı 5 türli bağıtta jazğı demalıstar ūyımdastırılıp 600 ge juıq qazaq balası Qazaqstanğa kelgen bolatın. Eki jıl pandemya kesirinen ūyımdastırılmağan būl şaralar byıldan bastap qayta jüzege asa bastadı.
