28 şıldede “Otandastar qorynyñ” Prezidentı Abzal Saparbekūly T | «Otandastar Qory»
28 şıldede “Otandastar qorynyñ” Prezidentı Abzal Saparbekūly Türkı akademiasynyñ prezidentı, “Egemen Qazaqstan” JŞS-nyñ Bas direktory Darhan Qydyrälımen kezdestı.
Jyly şyraida ötken äñgıme barysynda yntymaqtastyq qalyptastyru maqsatynda bırlesken bağdarlamalar men şeteldegı belsendı otandastar, elge oralğan qandastar turaly, sonymen qatar mädeniet, öner, ūlttyq qūndylyqtar bağytyndağy sait jäne gazet betterınde arnaiy aidarlar aşuğa, qazaq diasporasyna arnalğan ıs-şaralar jūmysyna aqparattyq qoldaular körsetu üşın jobalar men bağdarlamalar jasauğa kelıstı.
Sonymen qatar, «Otandastar Qory» KeAQ janynan qūrylğan şet elderdegı qazaq tıldı būqaralyq aqparat qūraldarymen aqparat almasuğa, bırlese jobalar jürgızuge, özara yntymaqtastaq ornatyp, arnaiy mamandaryn türlı käsıbi bağyttarda täjıribeden ötkızu jäne şeberlık sağattaryn ūiymdastyru turaly da söz qozğady.
«Basty maqsatymyz – bükıl älem qazaqtaryn tarihi jäne etnikalyq Otany töñıregınde bırıktıru. Negızgı bağyttarymyz – şeteldegı qazaqtardy aqparattyq-konsültasialyq qamtamasyz etu jäne mädeni-gumanitarlyq qoldau. Osy bağytta «Egemen Qazaqstan» respublikalyq gazetımen» ortaqtasa otyryp «Otandastar» degen ataumen 3 aida bır, iağni toqsanda bır şyğatyn jurnal şyğarsaq deimız», dedı A.Saparbekūly.
«Egemen Qazaqstan» respublikalyq gazetı» JŞS Bas direktory Darhan Qydyrälı «Otandastar qory» KeAQ prezidentı Abzal Saparbekūlyna rizaşylyğyn bıldırıp, qordyñ jūmysyna sättılık tıledı. Sondai-aq qandastar mäselesıne «Egemen Qazaqstan» respublikalyq gazetı beijai qaramaitynyn alğa tartyp, elımızdıñ bas gazetınde Özbekstan, Moñğolia, Türkia, Resei jäne İrandağy qandastarymyzğa qatysty materialdar jüielı türde jarialanyp otyratynyn tılge tiek ettı.
Odan bölek Darhan Qydyrälı myrza «Otandastar qoryna» aqparattyq qoldau körsetuge ärdaiym daiyn ekenın, «Egemen Qazaqstan» gazetınde şettegı qandastarğa, elge qonys audaryp kelgen qandastarğa asa köñıl böluge barynşa tyrysatynyn jetkızdı. Şalğaidağy qazaqtarğa qatysty arnaiy materialdar jazylyp, aldağy uaqytta qandastar mäselesın köteretın arnaiy aidar aşuğa da bolatynyn aitty.
Talqylanğan mäselelerge bailanysty taraptar aldağy uaqytqa arnaiy jospar qūryp ekı jaqty memorandumğa qol qoiuğa uağdalasty.
