2022-02-27 13:49:47
"Заманагөй мектеп" атағын алған билим дәргайына
Бизиң Заманагөй, Ҳасыл мектепте
Әйне басшы кең пейлине жараса,
Сый, ҳүрметтиң алғысында орасан,
Заманагөй атқа мүнәсип мың сан,
Қәд көтерди билим бизиң мектепте.
Елдиң келешегин қолынан тутқан,
Журт басының мақсет, әрманын уққан,
Шебер устазлар көп жетилип шыққан,
Бизиң заманагөй, ҳасыл мектепте.
Ҳадал мәржан терлер бийкар кетпеген,
Тәлим - тәрбия дәнин пуқта шөплеген,
Қызыллатып қырман үйген көплеген,
Бардур шадлы мийнет бизиң мектепте.
Көксине исеним белгисин таңған,
Ҳәр ханада үмит жулдызы жанған,
Төбесинен бахыт қусы айланған,
Мол имканият бардур бизиң мектепте.
Устаз - муғаллимниң силтеген таўын,
Таўып алып, бийик шыңлардың баўын,
Гүллендирген зор турмыстың тараўын,
Алғыр базлар ушты бизиң мектептен.
Флора ҳәм Венера, Шыңғыс, Карамат,
Рано, Гүлнарадай мисли ҳасыл зат -
Ҳәр бири бийбаҳа, алтын жәмәәт,
Қызғын мийнет етер бизиң мектепте.
Кел, достым, гәпимниң айтайын ҳағын,
Әдиўлеген халқымыздың ығбалын,
Көргендей боларсаң бейиштиң бағын,
Бизиң заманагөй, ҳасыл мектепте.
Онда Едигениң мәрт зүрияды бар,
Ана Тумаристиң сап әўлады бар,
Және Ерназардың нық саўлаты бар,
Бизиң заманагөй, ҳасыл мектепте.
Елдиң қуўанышы, дәрти менен бир,
Туўры иске қойған шәрти менен бир,
Кеўлинде болмаған теңгедей бир кир,
Заманагөй жан бар бизиң мектепте.
Аппақ қағаз бенен гөззал өмирде,
Қолға қәлем алып усы өңирде,
Көп қатары жүрген әпиўайы мен де,
Бахытлы устазбан ҳасыл мектепте.
Жақсылардың ҳикметинен жайнап нур,
Билимниң қазаны бурқып қайнап тур,
Бунда ҳәр партадан шығар алтын, дүр,
Бизиң заманагөй, ҳасыл мектепте.
Автор : Азат Даўышбаев.
@azatdawishbaev
62 views10:49
Н
