Отызда орда бұзбаған қырықта қамал алмайды
"30 жас" десе, осы мақал есімізге түседі. Жалпы мағынасын түсініп тұрмыз: "30-да мардымды бір тындырмасаң, 40-та үлкенірек бір нәрсеге жете алмайсың" деп тұр.
Маған бұл мақалдағы "бұзу" деген сөз ұнап тұрған жоқ. Жақсы мағынада қолданылып тұрса да.
Бұзу – бір нәрсені орнынан алып тастау. Кейде бұның артында "орнына басқа нәрсе қоям" деген ниет жатуы мүмкін. "Өміріңді өзгерт", "бәрін жаңадан баста" деген сөздер де бар еді осы категорияға кіретін.
Мен мынадай пікірді ұстанамын: "өміріңді 180 градусқа өзгертудің қажеті жоқ, оны тек реттеу керек" деген.
Ал реттеу дегеніміз – бар нәрсені ұқсату. Енді жоғарыдағы мақалымызды былай деп өзгертіп көрейік:
"30-да орда сала алмаған 40-та қамал тұрғыза алмайды."
Бұзу оңай, бірақ тұрғызу қиын. Үйленіп, кейін "өмірімді өзгертем, бәрін жаңадан бастаймын" деп, ажыраса салу оңай. Бірақ отбасы ғимаратын жылдар бойы тұрғызу қиын.
"Өмірімді өзгертем" деп, бір мамандықтан екіншісіне секіре беру оңай. Бірақ бір іспен жылдар бойы айналысып, бар нәрсені ұқсатып, шеберлік мұнарасын тұрғызу қиын.
20 мен 30-дың арасындағы жолды жүріп өткен адам ретінде артқа қарап, 20-дағы іні-қарындастарыма айтарым мынау:
Бұзу емес, тұрғызуды көбірек ойла. Қазір жан-жағыңда кірпіштер шашылып жатыр. Энергия, білім, уақыт, мүмкіндік кірпіштері. Соны бір-бірден алып, "ақырын жүріп, анық басып", қалай баста. Сонда 30-ға қарай кемінде бір орда салып тастайсың. 30-да жүйесіз жатқан құр кірпіштердің үйіндісін көргің келмейтін шығар?
https://t.me/dzhigitbek
