Аёл маҳрамсиз қанча масофага бора олади
Ассалому алайкум! Аёл киши маҳрамсиз қанча масофага бориши мумкин? Ўз ватанидан чиқмаган ҳолатда қўшни вилоятларга маҳрамсиз бориши жоизми?
Жавоб:
– Ва алайкум ассалом! Намоз қаср қилинадиган масофадан кам бўлса, маҳрамсиз бориши жоиз.
Чет элга маҳрамсиз чиқиш
Ассалому алайкум, Одина опа! Аёлларнинг чет элга маҳрамсиз чиқишига бирор бир истисно ҳолатлар борми? Агар бу нарса гуноҳлигини чет элдалик вақтида англаб етилса ва аёл турмушга чиқмаган бўлса, қандай йўл тутиши керак? Бу ҳақда қайси манбалардан саҳиҳ ҳадислар орқали маълумот олиш мумкин? Жавоблар учун олдиндан раҳмат. Аллоҳ рози бўлсин!
Жавоб:
Ва алайкум ассалом.
Ибн Аббос розияллоҳу анҳудан ривоят қилинади:
«Набий соллаллоҳу алайҳи васаллам хутба қилиб:
«Зинҳор эр киши аёл киши билан холи қолмасин. Илло, у аёл билан маҳрами бўлса, майли. Аёл киши фақат маҳрами билангина сафар қилсин», дедилар. Шунда бир киши туриб:
«Эй Аллоҳнинг Расули! Менинг хотиним ҳажга чиқди. Мен эса фалон ғазотга ёзилдим», деди.
«Бор! Хотининг билан бирга ҳаж қил», дедилар».
Истисно ҳолат шуки, аёл жонини ё номусини асраш учун сафар қилишга мажбур бўлиб қолса ва маҳрам топилмаса, шунда у ўзини эҳтиёт қилган ҳолда маҳрамсиз сафар қилиши мумкин бўлади. Шунингдек, дорулҳарбдан дорулисломга ҳам маҳрамсиз сафар қилиши мумкин. Шунда ҳам иложи борича аёллар гуруҳида бўлиши лозим. Чет элда маҳрамсиз юрган аёл ё маҳрамини топади, ёки чақиради, имкон бўлмаса, тезда сафардан қайтади. Бу ҳақда фиқҳий китобларда ҳам, ҳадис тўпламларида ҳам етарли далиллар бор.
УМРАГА МАҲРАМСИЗ БОРСА БЎЛАДИМИ?
Ассалому алайкум! Мен ва хўжайиним онамни умра зиёратига олиб бормоқчимиз. Дадам бормоқчи эмаслар. Онам маҳрамсиз борса бўладими? Умуман, умрага маҳрамсиз бориш мумкинми? Олдиндан раҳмат.
Жавоб:
– Ва алайкум ассалом! Cизнинг хўжайинингиз онангизга маҳрам бўлади. Шу маҳрам билан сафарга, жумладан, умра сафарига бориш жоиз. Аёл киши сафарга маҳрамсиз бормайди.
Валлоҳу аълам.
Одинахон Муҳаммад Содиқ
#Савол_жавоб
https://t.me/dilimga_yaqinim
