Түсініксіз құбылыс болды: үрейі ұшқан адамдар жапа-тармағай қа | КТК жаңалықтары

Түсініксіз құбылыс болды: үрейі ұшқан адамдар жапа-тармағай қашты

Куәгерлердің хабарлауынша, олар дірілді сезінген. Қытайдың Шэньчжэнь қаласындағы SEG Plaza сауда орталығының ғимараты кенеттен қозғалып, теңселе бастады. Үрейі ұшқан қызметкерлер мен сатып алушылар қауіпсіз жерге жүгірді. ​Биіктігі 300 метрлік көп қабатты ғимарат Қытайдағы ең биік ғимараттардың бірі болып саналады. Желіде жарияланған видеодан адамдардың көк тіреген ғимараттан жүгіріп шығып жатқанын көруге болады.

Жергілікті БАҚ-тың хабарлауынша, барлық адамды эвакуациялауға бір сағаттан астам уақыт кеткен. Сауда орталығының теңселуіне не себеп болғаны әзірге белгісіз.

 "Қаладағы жер сілкінісін бақылау станцияларының мәліметі тексеріліп, талданғаннан кейін сейсенбі күні Шэньчжэньде ешқандай жерасты дүмпуі болмағаны анықталды", - делінген Weibo платформасында жарияланған ресми тұлғалардың мәлімдемесінде.

 Сарапшылар ғимараттың негізгі конструкциясында немесе сыртында қауіпсіздік ережелері бұзылмағанын, ал ішкі және сыртқы компоненттері бүтін екенін анықтады, деп жазады sputnik. SEG Plaza сауда орталығы 72 қабаттан тұрады, онда электроника дүкендері мен мейрамханалар орналасқан.

Зәулім ғимараттың 50-68 қабаттары – "көктегі қонақ үй". Ғимаратта айналаны шолу алаңы да бар.