Ақ Сарбаз - Тәңір Жауынгері

2023-01-15 03:00:05 ЭКСПЕРИМЕНТ
Өзіңізді эксперименттің құрбаны секілді сезініп көрдіңіз бе? Мен кейде өзімді Ғарыш Мектебі лабораториясында экперимент үшін асырап отырған қоян сияқты сезінетінім бар. Бірақ, экспериментті сәтті өткеріп, тағдыры Тәңіріге бет бұрған БАҚЫТТЫ қоян. Эксперимент тек қоян мен тышқанға ғана жасалады деп ойлап қалмаңыз. Бұл Жер ғаламшарында арыстанға да эксперимент жасалады. Арыстан мен жолбарысты будандастырып Лигр жаратып жатқан адамдардан не сұрайсыз!
Меніңше бұл дүниедегі адамның бәрінің үстінен қазір үлкен эксперимент жүріп жатыр. Біздің миымыз бен тән санамызды теледидар деп елестетсек, оның пультіне таласатындар көп. Бізді қоршаған Астрал, Ментал дүниесіндегі түрлі Тіршілік Иелері біздің болмысымыздан өз каналын ғана көргісі келеді. Мысалы отағасы саяси жаңалықты, шешесі сезімдік сериялды, бозбала эротикалық фильмді, сәби мултфильмді көремін деп ықылас танытпай ма? Осылайша біздің сана экранымыз көрінбейтін күштердің ықпалымен түрлі каналдарға әлсін-әлсін ауысып отырады.
Жарық Күштері біздің сана-экранымызға танымдық, тәрбиелік ақпараттарды жіберсе, Түнек Күштері керісінше қорқынышты, аздырушы ақпараттарды тықпалайды.
Санамызды тек өзіміз басқарып, өзіміз қалаған ой мен сезімді сезініп өмір сүруіміз өте қиын, тіпті мүмкін емес деуге болады. Жаман ой мен сезімді санаға енгізбеуге барынша тырысып, күні бойы ширығып жүрсеңіз де түнде маужырап бейқам ұйқыға кетіп бара жатқанда Түнектің ақпараттық шабуылына ұшырауыңыз әбден мүмкін.
Санаға сап ете түскен ақпараттың Жарықтан не Түнектен екенін қалай ажыратамыз?
Егер сізде астралды сезім дами бастаған болса Ізгіліктің жұпар иісі мен Зұлымдықтың сасық иісін сезесіз. Мұны алғашқыда түсінбей, «жақын жерде бірдеңе шіріп жатыр» деп ойлап қалуыңыз мүмкін. Бірақ ол жаныңыз жиіркенетін мүңкір иіс Астрал Дүниесіндегі сізге жақындаған Зұлым пиғылдың иісі.
Айналасына ізгілік жұпарын шашқан Ұлы Рухтардың денесі өлгенде де шірімейді. Сол баяғы жұпар шашқан қалпында сақталады.
Адамзаттың әлемдік дәрежедегі лидерлерін де бар болғаны эксперимент астындағы арыстан не аю деп атауға болады.
Түнектің сасық жоспары – алтын миллиярд, Жарықтың жұпар жоспары – Жерұйық.
Әманда, жарықтың эксперименті жеңіске жетсін деп тілейік! Ашу / Түсініктеме

2023-01-15 02:59:41 Ашу / Түсініктеме

2023-01-14 12:21:50 ТҰРАҚСЫЗДЫҚТЫҢ ТҮБІ
«Ақ Сарбазды бір көрсем, сұхбат құрсам, сұрайтын нәрселерім көп» деп құлшынатындар, өздерін бұған қандай «КҮШ» итермелеп тұрғанын ойланса деймін. Өйткені, егер Құдай қалап, Ұстаздың алдына бара қалсаңыз Ол сіздің барлық құпияңызды көреді. Қайда бара жатқаныңыз, қайдан келе жатқаныңыз... Аузыңыз айтқанды қолыңыз істей ала ма? аузыңыз «барам» деген жерге аяғыңыз бара ала ма? бәрі-бәрі көрініп тұрмақ. Бұрынғы ғұмырларыңыздағы, осы ғұмырыңыздағы жақсы-жаман кармаңыз да көрініп тұрмақ.
Егер сіз Түнек жетегіндегі адам болсаңыз, Ақ Сарбазға бару, оны мойындау арқылы Жарық Күштері жағына шыққан боп есептелесіз. Енді сіздің қауіпсіздігіңізді Жарық Күштері қамтамасыз етеді. Алайда ерсілі-қарсылы жүріс жасау – үлкен қатерге ұрындырады.
1994 жылы Ақ Сарбаздың алғашқы кітабы орыс тілінде жарық көрген соң, көп кешікпей оған бір орыс жігіті іздеп келіпті.
Әлгі жігіттің оқымаған кітабы, тоқымаған білімі жоқ көрінеді. Ол жігіт қызыл тілін безеп, «артта қалған» «қараңғы» халықтан Ғарыш Сарбазы шығуы мүмкін еместігін дәлелдегісі келген сыңайлы.
Алайда оқыған білім қанша үлкен болса да, ол Ғарыш Санасымен қосылып жатпаса, түбі бір шолтиып шеті шығады.
Ұстаз ол «білімпазды» ол біле алмаған біліммен төмпештеп-төмпештеп, төмен түсіріп, тәубесіне келтіреді. Ол жігіт қазақты мойындап, Ақ Сарбаздың айнымас шәкірті болам деп уәде беріп, еліне аттанған.
Алайда артынан айнып, қазақты қаралап, Ұстазды табалап хат жазады. Хаттың соңында: «Сізге тағы барып, осы жолы өз сөзімді дәлелдеп шығамын» деп мәлімдейді.
«...Бірақ ол маған жете алмады» – деп әңгімеледі Ұстаз, – аэропортта біреу желкесінен темірмен ұрып, өлтіріп кетіпті... Ашу / Түсініктеме

2023-01-14 12:21:42 Ашу / Түсініктеме

2023-01-13 23:59:31 КИЕЛІ КІТАПТЫҢ ҚҰПИЯСЫ
Тоқсаныншы жылдардағы рухани ізденіс мені Алматының қара базарын шарлап рухани кітаптар іздеуге итермеледі. Бір күні Даниил Андреевтің «Роза Мира» деген кітабын көріп, қойдың құнындай ақшаға сатып алып оқып шықтым. Орыстың ақын-жазушысы әрі философы Д.Андреев қасиет көздері ашылғанда осы кітапты түрмеде отырып жазып шығыпты. Бұл кітаптан мен эгрегор дегеннің гаввах дегеннің не екенін, тағы да көптеген құбылыстардың атауларын білдім. Алайда мен оқыған кітаптардың еш жерінде кең байтақ Қазақ жері мен елі туралы ештеңе айтылмайтыны таң қалдыратын. Ресей бар, қытай бар, ортасындағы біз – қазақтар туралы ешбір рухани әдебиет ләм-мим деп жұмған аузын ашпайды. Неліктен? Кейін Ақ Сарбаз іліміне ден қойған кезде осы туралы Ұстаздан сұрадым.
– Бұл Ғарыштағы ең үлкен құпия болатын – деп жауап берді Ұстаз, – Бұл құпияны Өте Жоғары Дәрежедегі Жарық Күштері ғана білді. Бұл – Құдайдың ерекше Жоспары еді. Өйткені адамзат әбден азғындап Құдайдан безген уақытта, ақырға дейін азбай жететін қасиетті халық пен оның киелі Жері туралы Түнекшілер уақытынан бұрын білсе бізді жойып жіберетін еді.
Е.Блаватская, Е.Рерих, Д.Андреев сынды рухани дамыған тұлғалардың Ресейді мақтап, оның жарқын болашағын болжап жазған еңбектерінің аяғы не болды? Түнекшілер төңкеріс жасап патшаны тақтан құлатты да Иерархия Заңын бұзып, өз иерархиясын орнатты.
Люцифер ойлап тапқан коммунизм идеясы – ұлы идея. Бірақ ол Түнекке қызмет етті. Сол себепті 70 жылдан артық өмір сүре алмады.
Қазір Алтыншы сатыға өтуге дайынық үстіндегі адамзатқа түрлі рухани жолдарды насихаттайтын сансыз білім көздері ашылуда. Бұлардың көбі адамды адастыру үшін Түнектің ойлап тапқан қитұрқы амалы болуы да мүмкін.
Қазақтың Жерұйыққа айналар жері туралы, қазақ елінің адамзатқа көшбасшы болар болашағы туралы құпия енді жасырын емес.
Бұл туралы Ақ Сарбаз кітабында анық жазылған. Ендеше «Ғарыштан келіп жатқан» рухани «хабарларда» бұл ақпарат жоқ болуы қалай? Өздеріне Ғарыш Азаматтары болуға мүмкіндік алып берген қазақ халқын өзге ұлт өкілдерінің әлі күнге менсінбейтіндерін қалай түсінеміз?
Әлде мұның себебі біздің өз-өзімізді менсінбеуімізден бе екен?
«Жақыныңды жаттай сыйла, жат жанынан түңілсін» дейтін қазақ емес пе едік?!
Ақылмен саралап қарасаңыз Ғарыштың 7 Заңын Ақ Сарбазға дейін ешкім орын-орнына қойып, жүйелеп, талдап бере алған жоқ. Рухани кітаптарда Ғарыш Заңдары үзік-үзік қана баяндалатын. Ғарыштың қалай құрылып, қалай өркендейтінін түсіну үшін Ғарыш Заңдарын түгел білмек керек.
Ақ Сарбазға дейін өзінің бұрынғы өмірлерін түгел есіне түсіріп, оны жазып қалдырған да ешкім болмады.
Кітаптағы Білімнің құдыреттілігі сондай, оны осы уақытқа дейін ешкімнің түртіп қозғауға батылы жетер емес. «Сенуге сезімі жетпейді, зерттеуге білімі жетпейді» деп күледі Ұстаз осы туралы әңгіме болғанда.
Христиандардың киелі Кітабындағы «Жұбатушы-Параклет» деп аталған Ақиқаттың Рухы Жер бетіне Ақ Сарбаз есімімен жіберілгенде оны әу бастан күтіп жүрген алпауыт елдің діндарлары қабылдамай қойды. Тіпті Ақ Сарбазға «ақпараттық өлім» жариялады.
Ақ Сарбаздың алып Рухының бұл дүниеде жүргеніне 80 жыл толғанда барып, Оны қазақтар қуана қабылдай бастады.
Бұл туралы «Ақ Сарбаз» кітабында Киелі Кітаптан үзінді келтіреді:
«апостол Иоаннан бұрмаланбай жеткен Інжілде былай делінген:
«14-тарау.
17. Ақиқат Рухын бұл жалған қабылдай алмайды, өйткені Оны көре де, біле де алмайды; ал сендер Оны білесіңдер, себебі Ол сендермен бірге және бола бермек,
18. Сендерді жетім қылмаймын: сендерге келемін» («Ақ Сарбаз» кітабы. 324-б. Алматы-2022)
Демек Киелі Кітаптағы астарлы сәуегейлік әу баста қазақтар үшін жазылған болды ғой?! Ашу / Түсініктеме

2023-01-13 23:59:23 Ашу / Түсініктеме

2023-01-13 09:54:02 ӨЗ ӨЗІМІЗДІ БАҒАЛАЙЫҚ
«Сексен алтының желтоқсанында жас жанын Жер Ғаламшарын шырмаған түнектің торынан құтқару үшін құрбандыққа қиғандардың ішінде Алтыншы Сатының ұл-қыздары болды» – дейді Ақ Сарбаз. Адамзаттың Алтыншы Сатыға өтуі қазақ жастарының қасиетті қанының арқасында мүмкін болды.
«Желтоқсан Құрбандарының қаны адамзатты Әзәзілдің торынан босатты. Бұдан былай Құдайға сенушілер Ғарыш Азаматтарына айналады». («Ақ Сарбаз» кітабы, 5-тарау)
Қазақ: «малым – жаным садағасы, жаным – арым садағасы» дейді. Ел басына күн туғанда халық үшін құрбан болар батырлар ел ішінен әманда шығып отырған.
Құрбандық не үшін керек? Құрбандық немесе садақа беруші тарапқа энергетикалық ресурс сыйлайды. Яғни сіз қара күштерден көбірек зәбір көріп, шыдаған сайын зәбірлеуші тараптың карма зауалын күшейте түсесіз.
Бұл мәңгі жалғаса беруі мүмкін емес. Шыдамның да шегі болады.
«Әзәзіл үмбетінің сұмдық қылмысы нәтижесінде пайда болған жаңа карма мен жаңа энергия ресурсы Ақ Сарбазға кез-келген қарымта әрекетке мүмкіндік береді». («Ақ Сарбаз» кітабы, 5-тарау)
Ұлы Қазақ халқының шексіз шыдам-төзімінің арқасында Түнек Күштерінің қирайтын күні, соңғы сағаты үлкен шапшаңдықпен жақындап келеді.
Оны Ақ Сарбаз жүзеге асырады. Өйткені жаншылған, көп азап шеккен халықтың Перзенті ретінде Ол қарымта қайтаруға құқылы!
Құдай әу бастан таңдап алған, Тәңірінің сүйіктісі – Қазақ Елі Өзінің Тәңірлік Болмыс-Бітімімен, салт-дәстүрімен, тілімен жаңа өркениеттің көшбасшысына айналады. Бұл – көп қасірет шеккен, төзімі терең, шыдамы шексіз Ұлы халыққа берген Құдайдың құрметі мен сыйы!
«Біздің халқымыздың тіршілігі Ғарыш Жоспарына енгізілген. Тіпті Күннің өзі жарылып кетсе де, біздің еліміз аман қалады». («Тәңір Жауынгері» кітабы. «Ана») Ашу / Түсініктеме

2023-01-13 09:53:55 Ашу / Түсініктеме

2023-01-13 02:25:40 АЛТЫНШЫ САТЫ АДАМЫ
Рухани ізденіс Жанның шөлінен, Рухтың ашқарақтығынан туындайды. Жасырақ кезде адам Құдайды өз болмысынан емес сырттан, әртүрлі ілімнен іздейді. Бұл «Ақ Сарбаз» кітабында адамның «Адасушы циклі» деп аталады.
Бұл циклден бәрі өтеді. Өйткені қараңғы түнекте қалып адаспасаң жарықтың не екенін біліп, оны іздемес едіңіз.
Біз оқыған әр кітаптан ең әуелі өзімізді іздейміз. Не болмаса сондағы оқиға, құбылыстарды өз өміріміздегі оқиғалармен салыстырып бағамдауға тырысамыз. Бұл – дұрыс. Өйткені Құдайды іздеу дегеніміз – Өзімізді, Түптабиғатымызды іздеу ғой.
Рухани жолды бастауға талпынған адам «Ақ Сарбаз» кітабында баяндалғандай «Ізденуші» атты үшінші циклға қадам басады.
Ақ Сарбаз Өз миссиясының маңыздылығына орай әр циклды жеті жылда өтіп отырған.
Бірақ, адамның бәрі бірдей емес. Кейбіреуіміз өмір бойы «Адасушы» циклында, енді біріміз «Ізденуші» циклында қалып қойуымыз мүмкін.
«Құдайдың алдына келуші» циклында адам өзінің Рухани Ұстазымен қауышады. Ұстазының көмегімен бойындағы қасиет көздерін оятып, өзінің Құдайлық болмысын таниды. (Көпшілігіміз бұл циклға тәнді тастап шыққанда тап болып жатамыз, өкінішке орай)
Егер сіз қазір Жер бетінде өмір сүруші Жан болсаңыз «Құдайдың алдына келуді» Жұмаққа енумен шатастырып алып жүрмеңіз.
Қазір әрбір «Құдайдың алдына келген» Жанның өмірі арпалыс пен азапқа толы сынақтардан құралған.
Бұл жолдан бас тартуыңызға да болады. Бірақ шын оянған Рух, ащы ақиқатты көріп тұрып әрекетсіз қала алмайды. Бұндай адамның іс-қимылы ақылдың көзімен қарағанда ақымақтың әрекеті сияқты боп көрінуі де мүмкін. Алайда өмірді ғажап жағына өзгертетін де, көзсіз ерліктерге бара алатын да осындай адамдар. Ашу / Түсініктеме

2023-01-13 02:25:34 Ашу / Түсініктеме