2022-07-28 14:02:29
Шахбоз Умаров: «Ордабасыда» бірден бапкердің сенімін сезіндім және ұжымға сіңісіп кеттім»
«Ордабасы» жартылай қорғаушысы шымкенттік клуб, бас бапкер және командадағы әріптестері жайлы сұқбат берді.
- Шахбоз, шымкенттік команда сені қалай қарсы алды?
- Командада мен танитын адамдар жас болсын, тәжірибелі болсын аз болмады, Шымкентте де негізінен таныстарым көп. Сол үшін командаға сіңісіп кету қиын болмады. Оған қоса, мұнда Беларусьте ойнаған - Всеволод Садовский мен Александр Батищев бар. Мен олармен көп сөйлесемін, олар маған бұл тұрғыда көмектеседі.
Бас бапкер, Александр Седневқа келсек, ол біраз уақыт Беларусьте жұмыс атқарған. Шымкентке келе сала онымен жақсы сөйлестік, тіл табысып кеттік. Командамен жаттыға бастағанда Седневтың әр ойыншыға ыңғайлы тәсілдері бар екенін байқадым. Бапкер бізге тіпті: «Мынау менің базадағы бөлмем, егер қаласаңдар келіңдер, сөйлесіп, кез келген сұрақтарыңды талқылай аламыз» деп айтты. Седнев - ашық-жарқын адам, бірақ жұмысқа келгенде ол қатты мінез көрсете біледі.
- «Ордабасыға» ауысу нұсқасы қалай пайда болды?
- Менің бір Улугбек Асанбаев деген танысым бар. Ол менен командаға қосылуымды, көмектесуімді және ойнауымды сұрады. Ал мен оған жоқ деп айта алмадым.
- «Ақтөбеге» баруыңыз мүмкін деген сыбыс болды, алайда БАТЭ-ның сұраған қомақты қаржысына байланысты ауысым орын алмады.
- Жеке өзім ондай ештеңе естімедім, бұл жайлы маған ешкім айтпады. БАТЭ-де жүргенде мен тек командамен жаттығып, ұсыныстарға назар аудармадым. Иә, маған көбі хабарласып, ұсыныс тастаған, алайда мен бәріне: «Әзірге мен «сары-көктермен» жұмыс істеудемін, маған тиіспеңіздер» дейтінмін. Дәл осылай мен агентіме де, таныстарымның бәріне де айтқанмын. Меніңше, бір командамен жұмыс істеп жатып екіншісімен келіссөз жүргізу құрметсіздік деп ойлаймын. Ал шілдеде «Ордабасы» нұсқасы пайда болды және мен бірден кетуге бел будым.
- Жаңа команда үшін екінші ойында сіз екі бірдей ассист авторы атандыңыз.
- Мен жарты жыл бойы өнер көрсетпедім, ал «Ордабасыға» келгенде бапкердің сенімін сезініп, ұжымға бірдкн сіңісіп кеттім. Жаттығуларда маған күш сала бастады, жылдам қалпыма келу керек болды, себебі жарты жылда шынымен өз ойынымды жоғалтып алдым. Жаттығудан қалмай, жұмыс істедім, мұны көрген бапкер құрамнан орын берді. Осылайша екінші ойында-ақ екі бірдей нәтижелі пас бере алдым.
- БАТЭ-ден ауысқаннан соң өзіңізді физикалық тұрғыда қалай сезіндіңіз?
- Физикалық қалпым бұрынғыға қарағанда нашарлау екені бірден байқалды. Ойын тәжірибесі болмай, өзімді жоғалттым. Сол үшін «Ордабасыға» келіп мен базаға қоныстандым және әрдайым жұмыс істеудемін. Менде демалысқа және сауық-сайранға уақыт жоқ. Егер қажет болса бапкерлер де менімен жұмыс атқарады. Мен бір күнде жаттығуға, ұйықтауға және тамақ ішуге ғана үлгеремін. Соған байланысты ойыным жақсарып келеді. Құдай қаласа, көбірек ойнап, негізгі құрамға шығамын.
Айтпақшы, клуб базасының өте жақсы екенін айтып өткім келеді, жұмыс істеу рахат сыйлайды. БАТЭ-ның базасымен салыстырмаймын әрине, себебі әрқайсысының өз ерекшелігі бар, Шымкентте жұмыс істеген ыңғайлы. База стадионға жақын орналасқан, бұл да ыңғайлы. Алаң табиғи, жақсы қалыпта. Ең бастысы, «Ордабасы» жанкүйерлері ең керемет. Олар мені жақсы қарсы алып, Instagram-нан жазды, ойындардан соң қолдайды.
- Қазақстанға көшкенде өзіңізді еркін сезіндіңіз бе?
- Әлбетте. Қанша уақыт ойнамадым, футболды сағындым. Жарақатқа байланысты айлар бойы ойнай алмасам мейлі еді. Бірақ менде ол болмады. Қазақстанға көшіп, көңіл-күйім бірден көтерілді, футбол жайлы ғана ойлап, алаңға шығатынымды білемін. Сөзсіз, бұл жерде жеңіл. Алдағы жарты жылда (келісім-шарт осы уақытқа дейін жоспарланған) футбол мен «Ордабасы» жайлы ғана ойлай аламын.
44 views11:02
S
