Қандас оқушылар арасындағы қазақ тілі мен әдебиеті олимпиадасы | «Otandastar Qory»

Қандас оқушылар арасындағы қазақ тілі мен әдебиеті олимпиадасының жеңімпаздары анықталды.

Түркістанда қазақ диаспорасының балаларына арналған «Қазақстан – ата жұртым, қасиетім – ана тілім» атты қазақ тілі мен әдебиеті пәні бойынша ХІХ Халықаралық олимпиада өз мәресіне жетті. 2022 жылғы 26 маусым мен 1 шілде аралығында өткізілген жарысқа жақын және алыс шетелдерден: Иран, Қырғызстан, Өзбекстан, Моңғолия және Ресей Федерациясында тұратын 67 оқушы қатысты.
Олимпиаданың бірінші күні білімпаздар «Абай – ізгі қасиеттердің жоқтаушысы», «Ұлы тұлға – ұлт ұстазы» (Ахмет Байтұрсынұлының 150 жылдығына орай), «Әлихан Бөкейхан – ұлт мүддесінің жанашыры», «Менің таңдаған мамандығым», «Менің Қазақстаным» сияқты тақырыптарда эссе жазды.
Екінші күні оқушылар қазақ тілі мен әдебиетінен білімдерін, шешендік өнері мен халық ауыз әдебиеті шығармаларын орындау шеберліктерін көрсетті. Сонымен қатар әділқазылар алқасының алдында зерттеу жұмыстарын қорғады.
Мәдени бағдарламаның шеңберінде қатысушылар Арыстан баб, Қожа Ахмет Яссауи кесенесіне тағзым етіп, Отырар мұражайы мен «Ұлы Дала Елі» орталығын тамашалады. Сонымен қатар оқушылар Қ.А. Яссауи атындағы Халықаралық қазақ-түрік университетінің ғалымдарымен кездесіп, мазмұнды әңгіме қозғады.
Еске сала кетейік, олимпиада шеттегі қазақ дарынды балаларын анықтау және олардың тілге, әдебиетке, тарихқа ынталандыру және қазақ халқының мәдениетіне деген қызығушылықты арттыру мақсатында ұйымдастырылды.
Барлық жеңімпаздар мен жүлдегерлер ҚР Оқу-ағарту министрлігінің I, II және III дәрежелі дипломдарымен, сонда-ақ алтын, күміс және қола медальдармен марапатталды. Ал үздік деп танылғандар «Отандастар Қоры» КеАҚ-ның Бурабай ұлттық курорттық-табиғи аумағында IQanat мектебі базасында өтетін жазғы демалысқа 3 тегін жолдама жеңіп алды.