Baxıt degen ne...? Dep kóp adamnan soradım. Olar tómendegishe | 🌹🌸MSHBSH TA'RBIYASHILARI KANALI🌸

Baxıt degen ne...? Dep kóp adamnan soradım. Olar tómendegishe juwaplardı berdi

• Mektepke barmaģan baqsha jasındaģı balalar:

- baxıt degen ata-anam
- baxıt degen biziń qońsımģo
- baxıt degen Aynuranı jaqsı kóriw (óziniń jaqsı kórgen qızın aytıp atır)
- baxıt degen tárbiyashı apamız
- baxıt degen ne zat ol...

#bul_kishkene_perishtelerdin_juwabi

• 9-17 jaslar arasında...

- baxıt degen watandı jaqsı kóriw
- baxıt degen súygen yarıń menen qosılıw
- baxıt degen tuwısqan jora joldaslarıńdı baqıtlı etiw
- baxıt degen sabaqlardan jaqsı oqıw
- baxıt degen baqıtlı bolıw

• 18-25 jaslar arasında...

- baxıt degen jaqsı kiyiniw, qızlar qaramay qaladı yáki jigitler
- baxıt degen doslarım menen birge bolıw, qıdırıw
- baxıt degen oqıwģa byudjet tiykarında kirip ketiw
- baxıt degen jaqsı kórgen qızım oqıwģa kirip ketiwi, sebebi qızım oqıwģa kirip ketsem seniń menen júremen dedi
- baxıt degen otırıspaq, restoran, kafe...
- baxıt degen armiyaģa barıw, xalqımdı qorģaw

• 26-35 arasında...

- baxıt degen úyleniw, jaqsı ádepli qız tabıw
- baxıt degen jaqsı jumıs tawıp, shańaraģımdı baģıw
- baxıt degen ata-ananıń salamatlıģı
- baxıt degen jaydı remontlaw yáki tazadan salıw
- baxıt degen ózime gozallıq salon ashıw, bir jaģınan qızlarģa hár túrli sulıwlıq sawģa qılsam, ekinshi jaģınan dáramat

• 35-45 arasında...

- baxıt degen bala-shaģam
- baxıt degen balalarıń jaqsı bolsa, jat illetlerge qarsı bolsa, budan artıq baxıt joq maģan
- baxıt degen kóshemizdiń tınıshlıģı
- baxıt degen ata-anamızģoy
- baxıt degen kimniń balasısań dep soraģan waqtımda mınanıń balasıman dep tuwrı aytqızatuģınday abroyıń bolsa minekey saģan baxıt
- baxıt degen kún ısıp ketkende kóshemizden jası úlkenler mabada ótip baratırıp -mına terekti kim ekti eken, bereket tapsın dep aytatuģınday miyweli aģashlar kógertseń sol baxıt degeni...

• 50-60 jastaģılar...

- baxıt degeni namaz oqıw, allahtıń razılıshıģına bóleniw
- baxıt degen waqıtım artqa qaytqanda sol baxıt bolar edi, qartayģan adam jas balaģa elikleydi degeni ras eken, jaspan dep júrsem mine 60 qa shamalasqan ekenmen
- baxıt degeni aqlıģımdı kóriw, kelinim menen balam kóship ketip edi, olar kelmegeli biraz boldı
- baxıt degen jańalıqlardı gazetadan oqıw
- baxıt degen elimiz tınısh bolsa...

Oqıp gúwası bolģanıńızday baxıt hár túrli boladı, biraqta bir maqsetke mólsherlengen yaģnıy adamdı quwantıw.

Bulardı sorawda júdá aytarlıqtay ańsat bolģanı joq. Birewdiń balasın baqshaģa aparıp berdim, birewge jer awdarıstım, nal ektik, bir waqıtta gazeta oqıp kettik, balalarģa oyınshıq alıp berdik, qosılıp qıynaldım, qayģısın bólistim, shashların óristim, ulıwma aytqanda tiyip qashıp baxıt haqqında shamalı jıynadım.
Baxıt ne ekenligin teberik jastaģı Ata-apalarımızdan túsinip aldım, baxıt degen olarģa xizmet qılıw, olar menen gúrrińlesiw, azda bolsa jaslıģındaģı waqıyalardı aytıp beriwin soraw hám eń áhmiyetlisi olar menen ótkergen waqıttı umıtpaw, yadta saqlaw kerekligi bul haqıyqıy baxıt.

Eger oqıģan bolsańız sabır-taqatlarıńız ushın barakella doslar.

https://t.me/MSHBSH_TARBIYASHILAR_TOPARI