Киностан ️

2021-07-14 19:52:21 "Қара Жесірдің" оқиғасы "Капитан Америка: Азаматтық соғыс" пен "Кек алушылар: Шексіздік соғысы" фильмдерінің аралығында өрбиді.

Былайша абсолютли соқыршек жоба. Біз Наташа Романоффтың соңғы "Кек алушыларда" өлетінін білеміз. Сәйкесінше интрига жоқ. Оның дербес картинасы сонысымен қызықсыз: ол бәрін жеңеді, мақсатына жетеді, сосын "Шексіздік соғысына" қатысуға аттанады. Бәрін алдын ала біліп отырасың, басты кейіпкерге мүлдем жаның ашымайды.

Фильмді жоғарыда аталған екі бөлімнің ортасында көрсеткенде қызығырақ болар ма еді. Ашу / Түсініктеме

2021-06-19 17:43:41 Бірден айтайын - "Лука" Pixar студиясының үздік жұмыстарының қатарына кірмес. Өткінші, мейілінше қарапайым, ауқымы тар мульфильм. Графикасы ғана өз деңгейінде, бұл жағынан Pixar-ға жетері жоқ.

Балам екеуміз қазақша сеансына кірдік, залда тек екеуміз болдық. Сендерге де солай істеуге кеңес берем.

6/10 Ашу / Түсініктеме

2021-05-23 10:05:04 Зак Снайдерді талантсыз деуден аулақпын, бірақ тым асыра бағаланған режиссер дегенмен келісем.

"Өліктер армиясы" - оның соңғы режиссерлік жұмысы. Логика наққа кеткен топас картина.

Бірақ бұл жерде бір нәрсені ескеру керек - зомби туралы фильмде ешқашан логика болмайды. Қажет емес кезінде зомбиің жылдам бола қалады да сүйікті кейіпкеріңді жеп қояды, қажет кезінде шабан болып көрініп өлуі тиіс кейіпкер аман қалады. "Кезбе өліктер" сериалының стажы жоғары көрермені ретінде айтып отырмын сендерге!

Зак Снайдер зомби тақырыбында камера тербеген екен. Бұл жерде көрерменді екі-ақ тәсілмен байлап ұстауға болады: не треші көп болу керек - адамдар логика мен топас сюжетті ұмытып қарқ-қарқ күлу үшін, не өмірге барынша жақындатып, зомбиді тек фон ретінде пайдаланып, адами драма жасау керек. Фильмде екеуі де жоқ. Дым жоқ демеймін, ұтымды қолданыла алмаған.

Естімеген болып бұл картинаның жанынан өтіп кетсеңдер ештеңе жоғалтпайсыңдар. Ашу / Түсініктеме

2021-04-11 22:22:06 "Минари" философияғы толы сюжетімен ерекшеленбейді. Ол өте қарапайым - кейіпкерлерінің мінезі бірден ашылады, сюжеті күрделі емес, көрерменді ой тұңғиығына батырып, қинап тастамайды. Көтерген мәселесі, яғни персонаждарды алға жетелейтін мотивтері де бәріне ортақ.

Осындай "қолжетімді" болып шығуы оның басты ерекшелігі болса керек. Көрерменнің кез келген категориясына түсінікті әмбебаптығы үшін "Санденстің" бас жүлдесін, "Алтын глобус" алды деп ойлаймын. Сондықтан да биылғы "Оскардың" алты номинациясынан үміткер.

Қазақ көрермені де өзіне түсінікті нәрселерді көре алады, кинодан кейін өз дүниетанымына жақын деталдар арқылы өзінше ой түйе алады деп ойлаймын. Ашу / Түсініктеме

2021-04-11 22:22:04 Ашу / Түсініктеме

2021-04-02 21:47:52 Былжырап кететін сериалдар болады ғой. Соның бірі - "Кезбе өліктер". Есі дұрыс көрермен 4-5 маусымнан кейін тастап кеткен. Ал мен әлі қарап жүрмін. Бірақ әңгіме ол туралы емес.

Обшым орта деңгейлі сериалдан күтпеген сюрприздар болып тұратыны бар кейде. Осы "Кезбе өліктердің" (түсінбегендер болса - "Ходячие мертвецы") миллиондаған эпизодының ең жауһар сериясы қайсы екенін айтайын ба? Басты зұлымдардың бірі - Ниганға арналған жеке эпизод (10 маусым 22 серия). Білмейтіндер болса айта кетейін - Ниган сериалдың басты-басты деген жұлдыздарының тең жартысын 5 минутта қырып тастаған қанышер. Оны жек көрмейтін көрермен жоқ шығар. Бірақ оған арналған серияда соңғы 12 жылдық өмірі қамтылып, оның осы күйге жеткеніне не себеп болғаны баяндалады. Сіз білесіз бе - осындай тамаша қойылымның әсерімен зұлымға болысасың, антагонист бүкіл сериалдың фронтменіне айналады. Кейіпкердің трансформациясы, мотиві - бәрі жоғары деңгейде.

Ниган туралы эпизод бір төбе де, сериалдың қалған бөлігі бір төбе.

Тағы бір сериал туралы: "Басбұзар" (орысша "Сорвиголова") сериалы туралы білетін шығарсыз? Кей жерлері тым тәуір, кей тұстары іш пыстырып жіберетін орта деңгейлі жоба. Сондағы Карен деген екінші пландағы кейіпкерге арналған жеке эпизод бар (3 маусым 10 серия). Бұл да сериалдың жалпы сюжетінен бөлек жатқан дербес оқиға. Кейіпкердің өткені арқылы характерін жалаңаштайды.

Жоғарыда аталған екі сериалдың әлгі эпизодтарын бөлек фильм ретінде де қарастыруға болады. Тамаша драма не триллер шығар еді.

Не айтқым келіп еді? А, ия - ортаңқол сериалдар кейде осындай твисттерімен қуантып тұратыны бар. Ашу / Түсініктеме

2021-04-02 21:47:49 Ашу / Түсініктеме

2021-03-20 18:33:17 Ойбай, көтек! "Көшпенділер елі" туралы айтуға ұмытып кетіппін ғой.

Бұл әлгі жасырылған мағынасын іздеп, аллюзия мен эпитет іздеп кететін кино қатарынан емес. Адам келбетіне ірі планпен қойылған операторлық фокус (солай айтуға бола ма өзі?), актерлік ойын емес - жартылай импровизация, қойылым емес - деректі кадр эффектісін беретін картина мен үшін - өзіңді іздеу, өзіңді іздей жүріп жаныңның дертін емдеу туралы фильм ғой деген түсінік қалыптастырды.

Бұнда мінездердің қарама-қайшылығы, кейіпкерлердің оң мен теріс болып бөлінуі жоқ. Фрэнсис ‎Макдормандтың кейіпкерімен бірге тар фургонды бөлісіп, Американың сары даласын кезіп жүргендей боласың. Айтпақшы неге екенін қайдам, Фрэнсис апай осы жолы тіпті ойнамағандай болды. Жай ғана қасына операторды ілестіріп алып саяхаттап жүргендей құдды.

Меніңше бұл тым жеке, тым интим картина. Осы фильмді көріп отырып көрермен өзімен өзі оңаша қалғандай, өз-өзімен сырласқандай болады. Сағыныш, қайғы, жалғыздық, қанағат, сүйсіну, мейірлену сезімдеріңді оятқан естеліктерді басыңда қайта ойнатасың. Кейіпкердің де сол сезімдерді басынан өткізген сәттерін жан-тәніңмен түсінгендей боласың.

Режиссер Хлоя Чжао да көшпенді десе болады. Қытайда туып, Лондонда, кейін Лос-Анджелесте мектепте оқыған, жоғары білімді Массачусетсте және Нью-Йоркта алды. "Көшпенділер елінің" осындай жеке болып шығуына да режиссердің өмірі әсер етсе керек.

Режиссер де, актриса да биыл "Оскар" алып тұр ғо, примерно :) Ашу / Түсініктеме

2021-03-20 18:31:50 Ашу / Түсініктеме

2021-03-18 21:22:43 Бұрын да айтқам, қазір де айтамын - Әділхан Ержановтың "Қап-қара адам" картинасы 2020 жылдың үздік фильмдерінің бірі. Мен үшін солай әйтеуір.

Әне, Бэдкомедиан да мақтап жатыр :)
Youtube-ке шығыпты, бірақ ресми релиз бе, әлде қарақшылар шығарды ма - анығын айта алмаймын.
Не де болса көріңдер енді :)


Ашу / Түсініктеме