Ершат Қайболдин

2023-02-04 13:34:54 Өмір-ай Ашу / Түсініктеме

2023-01-21 19:03:02 Мен сені ұмытқанмын Ашу / Түсініктеме

2023-01-15 17:19:17 #Ауыл Ашу / Түсініктеме

2022-12-02 16:18:53 Арасында осылай өлең оқып тұрамыз)) Ашу / Түсініктеме

2022-12-01 13:49:19 Мен сенемін

Мен сенемін, ертең бір күн келеді,
Сахаралар көктейді, гүлденеді.
Қулық-сұмдық жойылып, жер-жаһанның
Бос қалады қаңырап түрмелері.

Доңыздар да тиіспей қоңыздарға,
Бас иеді қыранға нағыз қарға.
Білесің бе, сол кезде жауыздар да,
Қойдың өзін аяйды бауыздауға.

Ұрылар да сол кезде, қарылар да,
Малын қосып қояды малы барға.
Бір-бірімен ағайын араласып,
Адам таппай жүреді сағынарға.

Қарық қылып байлар да көп кедейді,
Сұрай қалса бар дейді, жоқ демейді.
Бәрі жақсы болғасын барлық адам,
Өкпелейтін жан таппай өкпелейді.

Ертең-ертең керемет күн келеді,
Сеземін ғой, сеземін бірдеңені!
Гүлденеді дүние, түрленеді,
Мен білмеймін, ол күнді кім көреді?

Ершат Қайболдин Ашу / Түсініктеме

2022-11-28 20:45:16 Қуанамын

Фәниге сәби келсе қуанамын,
Табыңдар қуантудың бір амалын.
Әйтеуір, мен барымды шығарамын,
Сүйінші сұраңдаршы, сұранамын.

Бәрібір шығыстан ба, батыстан ба,
Не жетсін бесік тойға қатысқанға?
Шіркін-ай, ешкім зәру болмаса ғой,
Бір тұтам атқамінер, атұстарға!

Бар қазақ қыз ұзатып, келін алса,
Ұрпағы батыр болса, сері болса.
Мал мен тал қалмаса да атасынан,
Мал бағып, тал егетін жері қалса!

Мал бағып, тал егу де - ғылым-білім,
Ол бәлкім салты шығар бұрынғының?
Айдың-күннің, жұлдыздың болашақта,
Ұрпағымыз түсінер сырын-мұңын!

Ұлым тілін түсінер күн нұрының,
Қызым тілін түсінер қыр гүлінің.
Түсінбесе өкпе жоқ ұл-қызыма,
Тілін білсе болғаны болғаны бір-бірінің!

Ершат Қайболдин Ашу / Түсініктеме

2022-11-26 17:14:46 Абайлаңдар

Қыз-қырқынға қылмыңдап, қырындамай,
Қыбырламай жүрсем де, жыбырламай.
Қырдың қызыл түлкісі секілденіп,
Түсесіңдер көзіме, сұлулар-ай.

Сылаң қағып көзіме түсесіңдер,
Көздеріңмен жейсіңдер, ішесіңдер.
Тоқаштар-ау, әлі де шикісіңдер,
Ертең шоққа түскенде пісесіңдер!

Шоққа түсіп піссеңдер - киесіңдер,
Асықпаңдар, сүйгізіп, сүйесіңдер.
Абайлаңдар, байқаңдар, тоқаштар-ау,
Отқа түсіп кетпеңдер, күйесіңдер!

Кім алады тоқашты отқа күйген?
Домалама, тоқташы, тоқтап үйрен!
Обалына ешкімнің қалмау үшін,
Өзімді өзім тұсаулап, ноқта кигем.

Абайлаңдар, тоқаштар, абайлаңдар,
Ойнап жүріп от басқан талайлар бар.
Мен - отпын ғой, лаулаған, жалындаған,
Өртеніп кетесіңдер, әрі ойнаңдар!

Ершат Қайболдин Ашу / Түсініктеме

2022-11-19 18:04:50 Құйсаңшы, бауырым!

Бұлдыр-бұлдыр болашақ беймағұлым,
Сезсеңдер ғой жанымның қиналуын.
Азан-қазан ойлардан құтылайын,
Қымызыңнан қанекей құй, бауырым!

Шайқап-шайқап құйсаңшы құтырғанын,
Құтырғаннан әйтпесе құтылмадым.
Құрып кеткір қулар-ай қара құрттай,
Жер-жаһанға жайыпты тұқымдарын.

Тостағыңды төңкеріп сімірейін,
Тәлтіректеп құлайын, сүрінейін.
Сілкінейін, қайтадан тірілейін,
Қашамаңғы түнеріп, түңілейін?!

Қымызыңның тәуірін татырмадың,
Ашығанын берсеңші, ақырғанын.
Ақыныңды азаптан құтқарып қал,
Ақылыңды қоя тұр, ақылманым!

Қылышыма қан жұғып, ұртыма май,
Қымыз ішсем оянар рухым оңай!
Менің рухым - Махамбет, ұлтым - Абай.
Батыр қылған қазақты, ақын қылған,
Жылқылар-ай, жылқылар, жылқылар-ай!

Ершат Қайболдин Ашу / Түсініктеме

2022-11-16 18:20:11 Қыс - қария

Қабағыңнан қар жауып жапалақтап,
Қыс - қария, келдің бе сақалы аппақ,
Ару - күзді ұзатып салу үшін,
Бір-екі ауыз алдың ба бата жаттап?!

Тірі қалып лайсаңнан, батпақтардан,
Күз - бойжеткен пәктігін сақтап қалған.
Қыс - қария, қызыңа кесіп-пішіп,
Аппақ көйлек тігіп бер аппақ қардан.

Күз - сылқымға ыстық-ау ұшқан ұя,
Сыңсу айтып қимай жүр құстар, иә?
Қыз жасауын бермейтін сараң байдай,
Отырсаң-ау сұстанып, қыс - қария.

Қыс - қария, қымбат па қу қара бас?
Қызың кетіп барады тыр жалаңаш!
Тау да, бау да көзімен ішіп-жеп тұр,
Сұлуларға сұқтанып кім қарамас?!

Күз - бойжеткен тағдырға қайтіп көнер?
Әлі бізге мұң-зарын айтып берер!
Қайтып келген қыздай боп соры қалың,
Әй, осы күз түбінде қайтып келер…

Ершат Қайболдин Ашу / Түсініктеме

2022-11-15 10:08:38 Қараша

Қарашада қара бұлт ағыл-тегіл
Жылап тұр-ау, жылай бер, жарыл-төгіл!
Жыламас ем, ешкімді жұбатпас ем,
Жүрегім - тас болса ғой, тәнім - темір.

Жүрегіміз тас емес білем біздің,
Сүртіп берем көз жасын күрең күздің.
Гүлден нәзік, мақтадан жұмсақ екем,
Ортасында өскендей кілең қыздың.

Саябақта сары күз, сары уайым,
Аралайын, уайымнан арылайын.
Ордендерін жоғалтқан қаһармандай,
Жапырақсыз қалыпты-ау кәрі қайың.

Қоңыр күзде қоңыр мұң кешіп келем,
Тоңғандарға тонымды шешіп берем.
Мезгілдер-ай, асыққан, кешікпеген!
Төсекке емес, таққа емес, табытқа емес,
Әлі жатқым келеді бесікке мен.

Қарашада қар жапты алтын күзді,
Ерте келіп қыс неге антын бұзды?
Көкжәшікте бір көкем көсемсіп тұр,
Ертең ол да алдайды бәлкім бізді…

Ершат Қайболдин Ашу / Түсініктеме