2022-10-10 04:42:29
Махаббатты көрдім... Ол адамның бетіне белгі боп бітеді екен
Жұмысқа келе салып екінші қабаттағы шағын бұрыштағы кофеханаға барамын. Жүзі жылы, сөйлеген кезде әр сөзінен иіліп тұратын, сені құрметтеп тұратын тәрбиесінің атмосферасы бірден сезіледі. 2 айдан асты күнделікті кем дегенде сол жерден 4-5 рет кофе ішемін. Арасында бариста жігіттің сүйіспеншілігі оянып, бір шоколадын тегін береді. мен де мәзбін: «клиентке деген қарым-қатынас осылай болса керек» деп...
Қазір әлгі бариста жігітпен: «үй-іші, бала-шаға, кәсіп қалай?» деп сөйлесеміз. Арасында «шаршадыңыз ба?» деп сұрап қалады. Оның бұрышта тұрып, кофе сатып, нәпақасын тауып отырғанын көріп «менікі не көкіректік» деймін де: «аздап» дей саламын.
Бір күні келсем бір қыз тұр. Кейін ол кісінің әлгі бариста-жігіттің күйеуі екенін білдім. Екеуі кезек-кезек жұмыс істейді. Екі кішкентайы бар. Таңғы 8-ден бастап екеуі кезек-кезек ауысып сағат 6-ға дейін сол жерде кофе дайындайды. Қымбат та емес.
Араға бір жарым ай салып, таныстық одан әрі қызған кез. Шешемді Астанадан Алматыға пойызға салып жіберетін болып «Нұрлы жол» теміржол вокзалына бардым. Пойызға отырғызып болып, үйге қайта беттеген кезде алдымнан: «Мәке, ассалаумағалайкум!» деген дауыс шықты. Денелі, сол жердегі қызметкерлердің киімін киген өзіме сондай жылы, әрі таныс адамды байқадым. Иә, мынау әлгі бариста жігіт қой! «Уағалейкумасалам!» деп жетіп бардым. Сөйтсем, әйелі екеуі кезектессе әңгіме басқада екен:
Бұл өзі осында жұмыс істейді. 2 күн жұмыс 2 күн демалыс екен. Сол 2 күнде үйде жатып алмай, мен жақтағы бұрышына келіп кофесін сатады. Әрі бір рет болсын өмірге налып әңгіме айтқанын көрген жоқпын. Ал енді мынаны қараңыз: әйелі де басқа жерде жұмыс істейді. Осындай графикпен. Ол да босай салып, күйеуінің орнына шығады.
Оу, қос әлемнің бір бағытқа қарай жүзуі деген осы ғой. Екі кішкентай құлынның берекесін құдай «мә» деп есіктен берген жоқ, соған апаратын жолды, күшті, жігерді, түсінікті берді. Қандай әдемі!
Вокзалдан шығып бара жатып бір кезде «шаршадыңыз ба?» деген сұрағын «аздап» деп жауап бергеніме ұялғаным сонша, келесіде мүлде ондай әңгіме айтпайтын болдым.
Шын айтамын, екеуін құдай ақ қосқан! Екеуінің де жүзінде адамды өзіне баурап алатын жылы бір леп бар. Кейде ойлаймын, сол лепті туа бітті адамға бермейді, ол ген қумайды, ол осындай берекелі істің жолында табанды еңбек еткеннің жүзіне берілетін өзіне лайық белгісі екен ғой...
04/10/2022
17:49
Марғұлан АҚАН
3 views01:42
D
